भांगरभूंय | प्रतिनिधी
जानेर सोंपता आनी फेब्रेर सुरू जाता. तेन्ना सैम आपली काया बदलपाक सुरवात करता. सांवर, पोंगारो, पानां झडोवन तयार आसात फुलांचो शृंगार करपाक. रानां- वनांनी जणू तरेकवार रंगीत फुलांची धुळवड चालू आसा. देवान रचिल्ल्या प्रत्येक वस्तूंत एक म्हत्व आसता. गिमाचे दीस सुरू जाल्यात. धर्तरी तापत आसा. हे तापते धर्तरेक आनी धगधगत्या सुर्याक आव्हान दिता आमची हीं रान झाडां. देवान तांकां रचल्यांय तशीं सड्यार जांव रानां- वनांनी तीं आपलो साज चडोवपाक विसरनात. अशेंच आमचें एक झाड म्हळ्यार सांवर. सांवरीक शाल्मली अशेंय म्हणटात.
सांवर म्हळ्यार शाल्मली, बोटेनिकल नांव बोम्बेक्स मलबारिका (BOMBAX MALBARICA) वा बोम्बेक्स सेलिना (BOMBAX CELINA) आनी इंग्लीश नांव सिल्क कोटन ट्री (Silk Cotton Tree) वा इंडियन सिल्क INDIAN SILK. संस्कृतान ह्या झाडाक कंटक द्रूम अशें म्हणतात. देजेंब्र म्हयन्यांत ह्या सगळ्या झाडाची पानां गळून पडतात, जानेरांत ताका कळे येवपाक लागतात. वसंत रुतू सुरु जाता ना जाता पुराय झाडाचेर फुलां फुलूंक लागतात. ही फुलां व्हडलीं, पांच पांकळ्यो, पांकळ्यो दाट आनी रंग तांबडो वा गुलाबी आसता. फुलां गळून पडले उपरांत तिका बोंडां येतात. तीं सुकले उपरांत तातुंतल्यान कापूस भायर येता. तो एकदम मोंव आनी सुळसुळीत आसता. ताका लागून हाका सिल्क कोटन म्हणता जांवये. फुलांक जायते पुंकेसर आसता. गिमाची सुटी पडल्या उपरांत हे पुंकेसर घेवन खेळ खेळपाक गांवांतली जायतीं भुरगी मग्न आसताली आनी ह्या झाडाची बोणां फुट्टकच धव्या
फुल्ल कापसाक म्हातारी म्हातारी म्हणीत कापसा फांटल्यान धांवपाक भुरग्यांक एक वेगळीच मजा येताली. आयच्या भुरग्यांक घडये हें खबर आसचें ना.
ह्या झाडाक खूब वखदी महत्व आसा. सांवरीच्या फुलां पसून भाजी, गुलकंद तयार करतात. पाकळ्यो सुकोवन तांचो पिठो करून सांधे दुखीक वापरल्यार एकदम बरो.
सोशल मिडिया वरवीं अशेंय कळून आयलां की महाराष्ट्रांत हळदुवी सांवर फुलता म्हण. हाचो पुरावो म्हळ्यार शेणवडे (ता. गगनबावडा) हांगा सांवरीचें अशेंय एक झाड आसा ताचेर तांबडी आनी हळदुवीं फुलां फुलतात.
हें झाड सद्या भरपूर बहरलां आनी ताचेर तरेकवार सुकणीं, मोंवां मूस म्होवांचो आस्वाद घेवपाक हजर आसात आनी जमनीर पडिल्ल्या फुलांच्या पाकळ्यांचेर सोंशे, चानयो ताव मारतात. महाराष्ट्रांतल्या कांय भागांनी तर धवींय कांटे सांवर आसा म्हूण सोशल मिडिया वरीं हांवें वाचलां.
गोयांत सर्रास मेळपी. बारिकसाणींत पळल्यार तांबडीं आनी गुलाबी रंगांचीं फुलांची सांवर गोंयांत सगळे कडेन आसा. ह्या फुलांचो संदर्भ पुराणांत आसा. वास्तू दोश, गृह दोश निवारण करपाक हीं फुलां एकदम प्रभावी आसात अशें जाणकार म्हणटात. तर अशे हे सांवरीची आमी राखण करपाक जाय.
प्रीता परब
9921382375
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
