भांगरभूंय | प्रतिनिधी
मुख्यमंत्र्या हस्तुकीं खेळां संघटनांक अनुदानाचें वांटप
पणजीः सरकारान खेळां संघटनांक वांटप केल्ल्या ग्रांवडाची देखरेख जाय नाशिल्ल्यान त्या ग्रावंडाचेर गोरवां चरतात. ग्रांवडाची अशी दशा जावची न्हय म्हण ग्रावंक घेवचे पयलीं ताची देखरेख करतले अशें लेखी आस्वासन खेळां संघटणेक ह्या फुडें खेळां प्राधिकरणाक दिवचें पडटलें, अशें मुख्यमंत्री डॉ. प्रमोद सावंत हांणी सांगलें.
३१ वेगवेगळ्या खेळां संघटणांक आनी तशेंच खेगळगड्यांक अर्थीक अनुदानाचें वाटप मंत्रालयांत मुख्यमंत्री डॉ. प्रमोद सावंत हांचे हस्तुकीं जालें. ह्या वेळार मुरगांवचे आमदार संकल्प आमोणकार, खेळां सचीव संतोष सुखदेव, गोंय खेळां प्राधिकरणाची कार्यकारी संचालक डॉ. गीता नागवेंकार आनी हेर खेळां संघटणेचे प्रतिनिधी हजर आशिल्ले. उपरांत मुख्यमंत्री सावंत हांणी खेळगडे आनी खेळां संघटणेच्या प्रतिनिधींचें मार्गदर्शन केलें.
खेळ हो सरकार आनी खेळां संघटणांची जोड भागीदारी आसा आनी देखून नीधी खातीर मागणी करप हो खेळां संघटणांचो हक्क आसा, अशें मुख्यमंत्र्यान सांगलें.
गोंयांत खेळां खातीर फावो तितली सुविधा तयार केल्या मात ताची देखरेख जातना नदरेक येना. वेगवेगळ्या वाठारांतले ग्रावंड बेवारस सोडल्यात. बरेचश्या खेळां संघटणांनी सरकारा कडेन ग्रावंड मागल्यात. मात ग्रावंडाचें वांटप जाले उपरांत आमी ह्या ग्रावंडाची देखरेख करतले अशें संघटणां कडल्यान लेखी घेवन ग्रावंड वांटप करचे अशें निर्देश खेळां खात्याक दितले, अशी म्हायती मुख्यमंत्र्यान दिली.
पेडणें ते काणकोण मजगतीं कितलेशेच ग्रावंड आसात तातूंत कांय बेवारस सोडल्यात. आमी हे ग्रावंड तयार करपाक कोटी रुपया खर्च केला. मात त्या ग्रावंडाचेर कांयच जायना. थंयसर गोरवां चरतात. वेगवेगळ्या खेळां संघटणांक आपले गरजे प्रमाण ग्रावंड बांदून दितले. मात तुमचे वटेन कांय योगदान घालून ते सांबाळचे. मात सरकाराक जेन्ना खेळ सोडून दुसर्या कामां खातीर जाय पडटलो तेन्ना कांय अटी सयत तो सरकाराक मात्सो दिवचो, अशी सुचोवणी मुख्यमंत्र्यान दिल्या.
हे खेपे ३१ संघटणनांक ५० टक्के अनुदान दिता आनी उरिल्लें ५० टक्के अनुदान पुराय अर्थसंकल्पाक मंजुरी मेळूंक नाशिल्ल्यान तें उरलां. ओगस्ट म्हयन्याचें विधानसभा सत्र सोंपले उपरांत उरिल्ल्या निधीक मंजुरी मेळटली आनी हें अनुदानाचे वाटप जातलें. सद्या २२ क्लबांक २७.४४ लाख आनी हेर खेळां संघटणांक २.१४ कोटी इतलें अनुदान दिलां, अशी म्हायती मुख्यमंत्र्यान दिली.
ओलिम्पिकाचे तयारे खातीर भितरलें कोफुसांव मिटयात
प्रधानमंत्री नरेंद्र मोदी हांणी आपल्या ११ वर्सांच्या कार्यकाळांत फीट इंडीया चळवळीक मुखार व्हरतना खेळाक उर्बा दिल्या. राष्ट्रीय खेळ आयोजीत करून ते आतां ओलिम्पीक २०३६चे येजमानकी खातीर सुरवात जाल्ली आसा. हे खातीर सगळ्या कडल्यान तयारी आतां सावन सुरू करपाची गरज आसा. संघटणांचे मुखेली म्हण तुमी भितरलीं केस्तांवां आसा तीं ती मिटोवपाक आनी एकठांय येवन फुडें वचपाक जाय, असो उलो मुख्यमंत्र्यान मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
