भांगरभूंय | प्रतिनिधी
भावंडांनो,
जून म्हयनो सोंपून जुलय म्हयनो परगटलो. पावस आपली गती, नेट वाडयत आसा. पूण ताका आमी शिणपाचें ना. कारण वर्सुकी परंपरेन थारिल्ल्या वेळार तो आयला आनी तिवूय आमकां आदीं सुलूस लावन तो येता. म्हणटकच ताका दोश दिवचे बदला आमी आमचेच जिणे पद्दतींत बदल घडोवन म्हळ्यार जतनायेचीं फावो तीं पावलां उखलूनच येता त्या दिसाक आमी फुडो करूंक जाय. देखून तुमी पावसाळ्यांत गरज ती तजवीज केल्या हेंवूय हांव जाणां.
भावंडांनो, तुमचे शाळेंतलो दरेक दीस तुमकां नवें नवें गिन्यान दीत मुखार वता. आदरणीय शिक्षकां वरवीं तुमी बरी उदरगत हातासपाक मन लावन वावुरतात हेंवूय हांव पळयतां. भावंडांनो तुमी अशीच तुमच्या गुरुजनां कडेन नम्र रावन गिन्यान मेळयत रावात आं. तुमी मन लावन शिकतात तें पळोवन म्हज्या जिवाक बरें दिसता. अशीच बरे देखीन शिस्तप्रीय रावात आं. दुबाव नासतना यश तुमचे फाटल्यान फाटल्यान येत रावतलें.
तर भावंडांनो, एक म्हत्वाची गजाल याद जाली देखून सांगता. विसरायेर घालूं नाकात आं. कारण तातूंत तुमचोय फायदो आसा. भावंडांनो, सद्या पावसान नेट धरला. भूंय फुगिल्ली आसा. अशा वेळार पावस, वारें नेटाचें व्हांवता. झाडां, रूख हुमटून वा तांचे खांदेय मोडून पडटात. ह्या वार्या वेळार भावंडांनो पावसांत भिजपाची मजा लुटपाक भायर भोंवूं नाकात, नाचूं नाकात. तुमची काळजी घेयात.
भावंडांनो, ह्या दिसांनी पावसाची थंडाय वाडिल्ल्यान जायतीं भावंडां दुयेंत पडल्यांत. वखद विरसद घेवपा खातीर तीं दोतोरांच्या क्लिनिकांत दिसतात. हालीं हालीं जळारां सावन जावपी दुयेंसांय वाडल्यांत. मलेरिया, डेंग्यू, चिकून गुनिया, सारकिल्लीं दुयेंसां मनशांचेर शेक गाजोवंक लागल्यांत. कांय जाण ह्या दुयेंसां कडेन आडनदर करतात. जळारां जातात त्या सुवातां कडेन नदर आड करतात, आनी ताचे परिणाम भोगतात. भावंडांनो, तुमी मात काळजी घेयात. जळारां जावची न्हय म्हूण खंयच दुशीत उदक सांचूंक दिवं नाकात. उक्तडार उडयिल्ल्या आयदनांनी, प्लास्टिकाच्या वस्तूंनी, टायरांनी, नाल्लाच्या कट्ट्यांनी, फुलझाडाच्या कुंड्यांनी उदक चड तेंप सांचपाक दिवं नाकात. तुमच्या घरांनी सांजवेळा, आमोरेचेर धूप घालपाक जाण्टेल्यांक सांगात. निवळसाण राखात. पावसांत गरम उदक पियात. थारावीक वेळेचेरच ताप, जोर बी आयल्यार रगत तपासपाक सांगात. सद्या जोरा कडेन तापा कडेन घाळ रावूं नाकात. दोतोराक मेळून वखद घेयात. तें नेमान घेयात. म्हणटकच तुमची भलायकी तंदुरुस्त उरतली. ‘जळार मुक्त वाठार’ राखपाचो यत्न करात.
भावंडांनो, तुमी तुमचे परीन जर संबंदीत दुयेंसांचें मार्गदर्शकी तत्वांक पाळो दीत जाल्यार मलेरिया, चिकून गुनिया वा डेंग्यू सारकीं दुयेंसां तुमकां आफुडची नात हें शंबर टक्के सत आसा. तुमी निरोगी उरतलीं आनी शिक्षण बरे तरेन घेवपाक सोंपें जातलें. तुमी घेतली न्हय जतनाय? शाब्बास. तुमी सदांच भलायकेन बरीं उरूं हीच म्हजी इत्सा.
उल्हासभाई
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
