भांगरभूंय | प्रतिनिधी
कृष्णायण
(हें लक्षांत येतकच ते राजा आपल्या सैन्या सयत हात हालयत परत आयलें. अशें तरेन जरासंधान मथुरेचेर घाल्ली पयली घुरी फुकट केली…. आतां मुखार…)
मथुरेंतल्यांन रथ घेवन भायर सरिल्ले कृष्ण आनी बलराम, कांय दिसांनी अवंतीपूरांतल्या सांदिपनी मुनीच्या आश्रमांत पावले. ते थंय पावचे पयलींच तांची कीर्त मुनीच्या कानांर पाविल्ली. मथुरेच्या क्रूर कंसाक कृष्णान सगल्या लोकां मुखार कसो मारलो हें तांच्या आश्रमांतल्या सगल्यांक खबर आशिल्लें. कृष्ण आनी बलराम आतां तशे भुरगे उरूंक नाशिल्ले. पिरायेन चड आसून लेगीत कृष्ण आनी ताचो व्हडलो भाव बलराम शिकपाची आस धरून आपले कडेन आयल्यात हाची सांदिपनी मुनीक खूब खोस जाली. तांणी तांची आश्रमांत रावपाची तजवीज केली. रथाक जोडिल्ल्या घोड्यांक दवरपाक कुशीक सुवात दिली. दुसऱ्या दिसा सावन कृष्ण आनी बलरामाचे शिक्षण सुरु जाले.
सांदिपनी मुनीन कृष्ण आनी बलरामाक सगल्या विशयांचें ज्ञान दिलें. पूण कृष्ण आनी बलराम हे राज घराण्यांतले आशिल्ल्या कारणान तांकां शिकयतना तांणी राज्य कारबार आनी शस्त्रविद्या या विशयांचेर चड भर दिल्लो. दोगूय शिश्य हुशार आशिल्यान गुरून शिकयिल्लें तांणी रोखडेच आत्मसात केलें. सांदिपनी मुनीन तांकां तरातरांचीं शस्त्रां कशीं वापरप, झुजांत तरातरांचे डावपेंच कशे येवजप हाच्यो बारीकसाणी शिकयल्यो. कृष्ण चक्राचो वापर करपांत निपूण जालो जाल्यार बलराम गदेच्या झुजांत. कृष्ण ताचे कमरेक आशिल्ले चक्र फट करून काडून सादारण पयस लेगीत आशिल्ल्या मनशाचे मानेर मारून ताचो जीव काडूंक शकतालो इतलो प्रवीण जालो. बलराम गदेच्या झुजांत आश्रमांतल्या सगळ्या शिकतल्यांक कांय न्ही कसो हारयतालो. आपल्या दोगांय शिश्यांची प्रगती पळोवन सांदिपनीक खूब उमेद जाली.
कृष्णान आनीक एक विद्या सांदिपनी मुनी कडल्यान शिकून घेतली आनी ती म्हणल्यार अश्वविद्या. घोड्यांची जतनाय कशी घेवप, तांचे कडल्यान आपणांक जाय तशें काम कशें करून घेवप, रथांक जोडल्या उपरांत तांचे कडल्यान रथ तरांतरांनी कसो घुंवडवप हें सगलें कसब कृष्णान आत्मसात केलें. कृष्णाचे शिकपाचे इत्सेचे सांदिपनी मुनीन सगल्या शिश्यां मुखार खूब कवतुक केलें.
सांदिपनीच्या आश्रमांत आनीक एक असोच शिश्य आशिल्लो. तो पोरबंदर गांवातल्यान मुद्दम शिकपा खातीर म्हणून सांदिपनी कडेन आयिल्लो. तो एका गरीब ब्राह्मणाचो चलो आशिल्लो. ताचे नांव सुदामा. सांदिपनी मुनीच्या सगळ्या शिश्यां भितर सुदामा सगळ्यांत हुशार आशिल्लो. आपल्या सभावाक लागून, तो कृष्ण आनी बलरामाचो सामको लागचो इश्ट जाल्लो. आश्रमांत ते तिगूय जााण चड करून एकठांयूच आसताले. शेतात काम करतना, न्हंये वयल्यान उदक हाडटना, रानांतल्यान सुकी लाकडां एकठांय करून घेवन येतना, आश्रमाचो वाठार निवळ करतना, आश्रमाच्या जागेत झाडां रोयतना सांदिपनीचे हे तीन शिश्य वांगडांच आसताले. आश्रमांत रावतल्या सगल्या जाणांक कृष्ण आनी सुदामाची इश्टागत खबर आशिल्ली. कृष्ण आनी सुदामा हांचे भितर एकूच फरक आशिल्लो आनी तो म्हणल्यार कृष्णाक शस्त्रविदयेंत रुची आशिल्ली जाल्यार सुदामाक वेद- तत्वज्ञान ह्या विशयांत.
कांय वर्सांनी कृष्ण आनी बलरामाचें शिक्षण सोंपपाक आयलें. आनीक कांय दिसां उपरांत तांणी घरा वचूं येता अशें सांदिपनी मुनीन तांकां सागलें. अवंतीपूरांत आयिल्ल्याक तांकां एकदांय घरां वचूंक मेळूंक नाशिल्लें. तांकां खूब उमेद जाली. तांणी मागीर एक मनीस मुद्दम मथुरेक धाडलो आनी ते शिक्षण सोंपवन मथुरेत येतात असो निरोप दिवपाक लायलो. रोखडीच ही गजाल संबंद मथुरेंत पातळ्ळी. कोणेतरी ही बातमी मगधाक जरासंधा कडेन पावयली. बातमी कळटकच जरासंधान आपलें सैन्य कांय मांडलीक राजां कडेन दिवन तांकां मथुरेक धाडले. मथुरेंत भितर सरचे पयलींच कृष्णाक धरून मगधाक व्हरप अशी मांडणी करून जरासंधाचे सैन्य शिमेरूच कृष्णाची वाट पळयत रावलें.
(मुखार चलता)
अनिल नायक
9049079789
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
