भांगरभूंय | प्रतिनिधी
पणजीः सांत आंद्रे मतदारसंघांत नेम फाटीर मारून बांधकामां चलतात. तांकां नगर नियोजन खात्या कडल्यान (टीसीपी) मंजुरी वा दाखले मेळ्ळ्यात काय हाचेर दुबाव आसा. ह्या प्रकल्पा आड कितल्योश्योच कागाळी दाखल केल्यात. मात सरकार कांयच कारवाय करीना, असो गंभीर आरोप थळावे आमदार विरेश बोरकार हांणी केलो. तांणी मुखेल शार नियोजकांची भेट घेतली. ह्या वेळार आमदार आनी मुखेल शार नियोजक राजेश नायक हांचे मदीं बाचाबाची जाली.
आमदार बोरकार आनी रेव्ह्युलेशनरी गोवन्स पक्षाच्या पदाधिकार्या सयत पणजे पाट्यार टीसीपीचे कचेरेंत मुखेल शार नियोजक राजेश नायक हांची भेट घेतली. सांत आंद्रेंत चालू आशिल्ले मेगा प्रकल्प आनी टीसीपी कायद्या विशीं सुमार वरभर चर्चा जाली. वातावरण बरेंच तापले उपरांत मुखेल शार नियोजकान १६ एप्रिलाक प्रकल्पाची पळोवणी करपाचे उतर दिलें. बसके उपरांत उलयतना आमदार बोरकार हांणी सांगलें, टीसीपी नाका जाल्ल्या प्रकल्पांक परवानगी मंजुर करता आनी ते भायर काय बांदकामां परवान्या बगर चालू आसात, हाची टीसीपीक खबर लेगीत ना.
बांबोळे चालू आशिल्ल्या एका रिसोर्टाचे सुवातेची पळोवणी करपाक तारीख मागिल्ली. पूण टीसीपीन जाप दिवंक ना. पणजे आनी सरभोंवतणच्या वाठारांत कामां चलतात, मात ताची पळोवणी करपाक कोण वचनात, असो आरोप बोरकार हांणी केलो.
३९ (अ) खाला ज्यो कागाळी नोंद केल्ल्यो ताचेर अजूनय जाप ना. नेवरा एका बिल्डरान जागो घेवन वणत बांदपाचें काम हातांत घेतलां. शेतकारांक वाट सोडूंक ना. प्रादेशीक आराखड्या प्रमाण ज्यो बांयो सुवातेंत पयली सावनूच अस्तिवांत आसात त्यो टीसीपीन दाखोवंक ना. दिल्लीकारान दाखयिल्लो आराखडो सरळ मंजुर करून उडयला, असोय गंभीर आरोप बोरकार हांणी केलो.
फाटल्या नोव्हेंबर सावन दाखल केल्ल्या कागाळींचेर अजूनय आमकां जाप दिवंक ना. एकदां सुवातेची पळोवणी जाल्ली. मात अजून मेरेन ताचेर अहवाल तयार ना. जेन्ना टीसीपीचे अधिकारी आयिल्ल्ले तेन्ना पळोवणे वेळार तांकां दाखोवन दिलें, बिल्डरांक स मीटर रस्तो मंजूर जाला आनी जे थळावे शेतकार आसात तांकां शेतांत वचपा खातीर फक्त तीन मीटर रस्तो दिला. हाची जाप मागपा खातीर आमी मुखेल शार नियोजकां कडेन आयिल्ले, अशें आमदार बोरकार हांणी म्हणलें.
टीसीपीचे ३९ (अ) आनी न्यायालयान सद्या स्थगीत केल्लो १७ (२) अशे कायदे हाडून जमीन रुपांतर जालें जाल्यार गोंय काबार जातलें अशे आमी शार नियोजकांक सांगले उपरांत तांणी जाप दिली, हे कायदे गोंयकारांक लागून हाडल्यात. पूण प्रत्यक्षांत हे कायदे फक्त दिल्लीकारांक आपल्याक जाय ते करपाक मेकळीक दितात. थळाव्यांक सादें घर दुरूस्त करपाक मंजुरी दिवपाक हे वेळ काडटात, असो आरोप आमदार बोरकार हांणी केलो.
टीसीपीन येवन सुवातेची पळोवणी करची आनी बांधकाम दाखलो दिला काय, तें सोदून काडचें. आमदारांक विस्वासांत घेनासतना व्हड प्रकल्पांक परवानगी दितात. कुडका बांबोळी पंचायतीक ८० एफएआर दिवपाक मेळटा, पूण हांगा २९९ एफएआर दिला. हें दिवपा खातीर मंडळाची मंजुरी जाय पडटा. ती दिल्या काय ना हें निश्चीत करपा खातीर आमी पळोवणी करपाची मागणी केल्या, अशें आमदार बोरकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
