भांगरभूंय | प्रतिनिधी
सोगळे जांवय मावोड्यां आयले
फाल्यां कितें जाता तें जावं
आयज उमेदीन मनोवया सांजांव
सुंदर गोंय आसा आमचो गांव…
गोंयांतल्या क्रिस्तांव भावांची आनी चड करून नव्यान काजार जाल्यात त्या जांवयांची ही मनरिजवणेची परब.
सांजांव परबे दिसा जांवयांक मावोड्यां खाशेलो मान आसता.
सादारण जूनाचे सात तारखेक सुर्याचो मृग नक्षत्रांत प्रवेश जाता आनी हिंदूंची ‘मिरगा’ ची परब मनयतात. ताचे उपरांत पंदरा दिसांनी म्हणल्यार जूनाचे बावीस ते चोवीस तारखे मेरेन आमचे क्रिस्तांव भाव ‘सांजांव’ ही परब व्हड दबाज्यान मनयतात. सरभोंवतणी उटंगाराचो पावस झडत आसता अानी ह्या घोग्याच्या पावसांत ‘सांजांव’ परब मनोवप क्रिस्तांव भावांक उप्पाट खोशी दिवन वता.
सांजांव परबेक क्रिस्तांव भाव आपापल्या जांवयांक माये-मोगाचें आपोवणें धाडटात. ताका लागून त्या दिसा सगले जांवय गांवांतल्या एका व्हड बांय ( well ) चे लागीं एकठांय जातात. तेन्ना सगले लोक विंगड विंगड तऱ्हांचे आनी कोरांचे कपडे घालतात आनी माथ्यार फुलांची माळ आनी वाली बांदतात. क्रिस्तांव भावां वांगडाच हिंदू ,मुस्लीम, गुजराती भाव ह्या उमेदीचे परबेंत वांटेकार जातात.
सांजांव मनोवपाची बांय, फुलांच्यो माळो, वेली आनी बनेरांनी सजयिल्ली आसता. थंय जमिल्ल्या सगल्यांचें मांव आनी मांय ते बांयंत पिकिल्ले आंबे, पणसुलां, निरपणस अशे तरेचीं फळां सोडटात. ताचे उपरांत नव्या जांवयां वांगडाच हेर लोक बांय भोंवतणी फेर धरून बॅण्डाच्या तालार बेधूंद जावन नाचत आसतात आनी गायतात…
सोगळे जांवय मावोड्यां आयले
फाल्यां कितें जाता ते जावं
आयज उमेदीन मनोवया सांजांव…
ताचे उपरांत, जांवयांनी बायंत उडी मारून बांयंत उडयिल्लीं फळां भायर काडपाचो सुवाळो जाता. ह्या सुवाळ्या वेळार आपलो जांवय कितलो बरो पेंवपी आसा आनी कितलो धाडशी आसा हें लोकांक दाखोवपाची सर्त मांव आनी मांय मदीं लागिल्ली आसता.
तीं फळां वयर काडून जातकूच मागीर माडाची चुडटां एका हातांत आनी दुसऱ्या हातांत बियर वा गोंयच्या सुवादीक फेणयेची बाटली घेवन सगल्या सोयऱ्या – दायऱ्यांक वांगडा घेवन, बॅण्डाच्या बेधूंद करपी तालार नाचत जांवयांची गांवांत फेरी काडटात.
एक-एकदां, नव्यान लग्न जाल्लीं काजारी जोडपीं चकचकीत नवे कपडे घालून फेरयेंत वांटेकार जातात आनी सांजांव परबेची खोशी मनयतात.
पाचवोचार सैम, उप्पाट भरून व्हावपी व्हाळ, तळयो आनी बांय….आनी घोग्यांनी पडपी पावसांत भिजून चिप्प जाल्लें आंग आनी बेधूंद करपी आनी झींग हाडपी बॅण्डाचें लयबद्ध आनी तालबद्ध वाजप….वाऽऽह, क्या बात हैं ।
एकनाथ सामंत
9226219723
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
