भांगरभूंय | प्रतिनिधी
सांगेंः सांगेंचे आमदार आनी समाज कल्याण मंत्री सुभाष फळदेसाय हांच्या वाडदिसा निमतान सांगें मतदारसंघांत कृशी मंत्री रवी नायक, पशुपालन आनी पशुवैजकी मंत्री नीळकंठ हळर्णकार, पर्यटन मंत्री रोहन खंवटे, कुडचडेचे आमदार निलेश काबाल हांचे हाजिरेंत सुमार 40 कोटी रुपया खर्चाच्या चार मुखेल उदरगत कामांचें उक्तावण जालें, काब्राल, मायेंचे आमदार प्रमेंद्र शेट अानी फळदेसाय हांणी सुमार 2.65 कोटी रुपया खर्च करून ओल्ड वाडा, वेड हांगा बांदपाच्या शाळेच्या मैदान उदरगतीच्या कामाचो बुन्याद फातरीबसयलो.
पाजीमळ – उगें हांगा “कृशी घर” इमारत बांदपाचो बुन्याद सुवाळो कृशी मंत्री रवी नायक हांचे हस्तुकीं जालो. सुमार 10 कोटी रुपया खर्च करून हांगा भव्य शेतकी घर बांदपाचें आसा. तशेंच पाजीमळ सांगें हांगा सुमार 13.5 कोटी रुपया खर्च येवपाचो अदमास आशिल्ल्या “पशुचिकित्सा हॉस्पिटल” बांदपाचो बुन्यादी फातर बसोवपाचे सुवाळो पशुपालन आनी पशुवैजकी सेवा मंत्री नीळकंठ हळर्णकार हांच्या हाजिरेंत जालो.
दनपारां सांगें पुलीस स्टेशना खातीर नवी इमारत बांदपा खातीर बुन्यादी फातर बसोवपाचो सुवाळो मंत्री सुभाष फळदेसाय आनी मंत्री नीळकंठ हळर्णकार हांचे हाजिरेंत जालो. ह्या वेळार मंत्री रोहन खंवटे हाजीर आशिल्ले.
ह्या वेळार दुद वेवसायांत सांगें म्हाल मुखार आसा अशें मंत्री नीळकंठ हळर्णकार हांणी सांगलें. ह्या वाठारांत पशुवैजकी हॉस्पिटलाची गरज आसा आनी एक वर्सा भितर सगळ्यो सुविधा आशिल्लें सुसज्ज पशुवैजकी हॉस्पिटल बांदून पुराय जातलें. ताणें शेतकारांक दुदाचें उत्पादन वाडोवपाचें आवाहन केलें. ह्या हॉस्पिटलांत ऑपरेशन थिएटर आसतलें. हाचो फायदो शेतकारांक जातलो अशें तांणी सांगलें. सांगें हांगा शेतकी घराचो शेतकारांक फायदो जातलो आनी एका वर्सा उपरांत काम पुराय जातलें.
सांगें पुलीस स्टेशन इमारतीच्या बुन्यादी फातर बसोवपाच्या कार्यावळींत पुलीस महानिरीक्षक आलोक वर्मा हांणी सांगलें, सांगे पुलीस स्टेशनाची सध्याची इमारत खूब पोरणी आसा, ती 1946 वर्साची आसा आनी नव्या इमारतींत आधुनीक सुविधा आसतली. अठरा म्हयन्यांत हे इमारतीचें काम पुराय जातलें अशें तांणी सांगलें.
ह्या वेळार दक्षीण गोंयचे पुलीस अधीक्षक टिकम सिंग वर्मा, जिल्लो पंचायत वांगडी सुरेश केपेकार, नगराध्यक्ष शांती गडकार, उपनगराध्यक्ष संगमेश्वर नायक, आदले आमदार वासुदेव मेंग गांवकार, सचीव प्रसन्न आचार्य, कृशी संचालक संदीप फळदेसाय, पशुपालन संचालक डॉ वीणा कुमार, कृशी संचालक रघुनाथ मोरजकर, विभागीय कृशी अधिकारी शिरोडकार आदी हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
