भांगरभूंय | प्रतिनिधी
भाग शिक्षणाधिकाऱ्यान घेतले वर्ग; शिक्षका विणें कुमेरी शाळा बंद पडपाचे वाटेर
भांगरभूंय । प्रतिनिधी
सांगें: दोन दिसां आदीं वालंकिणी कॉलनी नं. 1 त शिक्षक नाशिल्ल्यान गांवचोच तरणाटो प्रेमानंद रेकडो भुरग्यांक शिक्षणाचे धडे दिताले. हाचेर भांगरभूंय दिसाळ्यान उजवाड घातिल्लो. ते उपरांत दुसऱ्याच दिसा ते शाळेंत शिक्षक पावलो. अशीच गत कुमारी भाटी सांग्यार शाळेची जाल्या. शिक्षक नाशिल्ल्यान ती शाळा बंद पडपाचो वेळ आयला.
शुक्रारा शिक्षक नाशिल्ल्यान हे शाळेक कुलप मारिल्लें. दुसऱ्या दिसा मुख्यमंत्री डॉ. प्रमोद सावंत हांची ऑनलायन मीट आशिल्ल्यान शाळेक सुटी दिल्ली. सोमाराय हे शाळेंत शिक्षक नाशिल्ल्यान दोन वरां भाग शिक्षणाधिकारी सीताराम नायक हांणी भुरग्यांक शिकयले. ते उपरांत विद्यार्थी बालवाडींत वचून बसले. आयच्या काळांत अशी घडणूक घडप ही सामकी लजेची गजाल, अशें मत थळाव्या पालकांनी उक्तायल्या.
भुरग्यांचो फुडार घडोवपी शिक्षणा संबंदीत हे गजालीचेर मुख्यमंत्र्यान गांभिर्यान लक्ष घालपाची गरज आसा. सध्या कांय लोकप्रतिनिधी व्हड व्हड प्रकल्प हाडपाचीं लोकांक हांयसां दाखयतात. सरकार उदरगतीचे झेत मारता. हें अशें आनी केन्ना मेरेन चलतलें, असो प्रस्न पालकांनी उपस्थीत केला.
भाग शिक्षणाधिकारी नायक हांणी सोमारा एका शिक्षकाक कुमारीचे शाळेंत शिकोवपाचो आदेश दिल्लो, पूण तो शिक्षक शाळेंत आयलोच ना. शिक्षक आयला काय ना तें पळोवपा खातीर नायक हे शाळेंत गेल्ले. थंय पावतकच शिक्षक थंय पावोकूच ना, हें कळटकच ताणें स्वता भुरग्यां खातीर दोन वरां वर्ग घेतले. हाका सरकार जालपासदार आसा. मुख्यमंत्र्यां कडेन खूब व्हड व्हड जापसालदारक्यो आसात. जर तांकां त्यो सांबाळनात जाल्यार तांणी त्यो दुसऱ्यां कडेन दिवच्यो, जे वरवीं शिक्षणीक मळाक न्याय मेळपाक शकता, अशें पालकांनी म्हणलां. खूबशा खात्यांनी कर्मचाऱ्यांची फोगीर भरती केल्या. ते कांयच काम करिनात, पूण पगार मात घेतात. आयज शिक्षक नाशिल्ल्यान शाळा बंद पडटात, ताचेर सरकार कित्याक विचार करिना? शिक्षक भरती करून भुरग्यांक न्याय दिवचो आनी शाळा वाटावच्यो, अशी मागणी पालकांनी केल्या.
हें आनीक कितलें दीस?: गांवकार
शुक्रारा शिक्षक आयलो ना म्हूण शाळेक कुलप मारलें. दुसऱ्या दिसा शेनवारा मुख्यमंत्र्यांची ऑनलायन मीट आशिल्ली म्हूण आमी ओगी रावले. सोमाराय तीच गत. शिक्षक ना म्हूण भाग शिक्षणाधिकाऱ्यान वर्ग घेतले. हें अशें आनीक कितले दीस चलपाचें? मंगळार मेरेन जर आमकां शिक्षक दिना जाल्यार आमी मुखार वतले, अशें आदले पंच रुपेश गांवकार हांणी सांगलें.
पेरा आनी टीईटी शिक्षकां मदीं ताळमेळ जुळनाः नायक
भाटी गांवांतले शाळेंत दोन शिक्षिका शिकयतात. तातूंतले एके शिक्षिकेक आपणें कुमारी वाठारांतले शाळेंत एक सप्तक मेरेन वचपाक सांगलां, पूण ती आपले कडेन ऑर्डर मागता. सध्या शिक्षण खात्या कडेन शिक्षक उणें आसात. तशेंच पेरा आनी टीईटी शिक्षकां मदीं ताळमेळ जुळना. तेच खातीर ही स्थिती निर्माण जाल्या. सोमारा कुमेरी शाळेंत शिक्षिका पावली ना, ताका लागून आपणे दोन वरां भुरग्यांक शिकयले, अशें भाग शिक्षणाधिकारी सीताराम नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
