भांगरभूंय | प्रतिनिधी
भांगरभूंय । प्रतिनिधी
पर्वरीः मुंबय उच्च न्यायालयाच्या गोंय खंडपिठान दिल्ल्या आदेशा वरवीं म्हापशेंच्या कोमुनिदाद संचालकान सांगोल्डें गांवांतल्या सर्वे नंबर .81/1 हातूंत अतिक्रमण करून बांदल्लीं 22 बांधकामां मोडून उडोवपाचें थारायलां आयज (शुक्रार) 12 एप्रिलच्यान हें काम हातांत घेतले.
गोंय खंडपिठान फाटल्या 3 एप्रिलाक कोमुनिदाद प्रशासन संचालनालयाक हीं बांदकामा दोन सप्तकां भितर मोडून सुवात मेकळी करून 25 एप्रील मेरेन न्यायालयांत कृती अहवाल सादर करपाचो आदेश दिल्लो. बांदकाम खात्याच्या काम विभाग 13क बांदकामां मोडपा खातीर बार्देशाचो उपजिल्होधिकारी आनी हेर एजन्सींक फावो तें सहकार्य करपाक सांगल्लें. आदेशाची कार्ववाही केली ना जाल्यार न्यायालयीन अवमाना खातीर कारवाय करपाची शिटकावणी गोंय खंडपिठान दिल्या.
उत्तर गोंय जिल्ह्यांतल्या उप विभागीय न्यायदंडाधिकाऱ्यान म्हापशें हांगच्या उत्तर विभाग कोमुनिदाद प्रशासकाक बांदकामां मोडपाक पंगड दिवपाक सांगलां. 12 एप्रिलाक सकाळच्यान ही बांदकामां मोडपाक सुरवात करतले.
बांदकामां मोडपा वेळार उत्तर गोंयच्या पुलीस अधिक्षकांक न्यायालयान 25 बायल पुलिसांचो आसपाव आशिल्लो 100 जांणीचो सशस्त्र पुलीस पंगडाक धाडपाक सांगलां. कायदो आनी सुवेवस्थेची परिस्थिती उप्रासल्यार तिचेर नदर दवोरपाक मामलेदाराक संबंदीत सुवातेर धाडपाक न्यायालयान बार्देशच्या उपजिल्होधिकाऱ्याक सांगलां.
फाटल्या 27 फेब्रुवारीक म्हापशेच्या उत्तर गोंय कोमुनिदाद प्रशासकाक सांगोल्ड्यांतली 22 बांदकाम मोडून उडोवपाची सगली तयारी केल्ली मात बांदकामां मोडून वडोवपी पंगड येवंक नाशिल्ल्यान ही कारवाय फुडें धुकलची पडिल्ली. संबंदीत 22 बांदकामां केल्ल्यान न्यायालयान कडेन बांदकामां मोडपा खातीर मुजत वाडोवन दिवपा खातीर केल्ली याचिका 6 फेब्रुवारीक खंडपिठान भायरायल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
