भांगरभूंय | प्रतिनिधी
फोंडें: मोलें पंचायत वाठारांतल्या सांगोड वाठारांत खारजाच्या उदकाचो उणाव जाल्ल्यान खूबशा शेतकारांक शेतां पडीक दवरचीं पडल्यांत. पुर्तुगेज काळांत बांदिल्ल्या खारजाक खूब कडेन खावटी पडिल्ल्यान व्हड प्रमाणांत उदकाची गळटी जाता. शेतां लागवडी खाला हाडचे खातीर खारजाची दुरुस्ती करची वा लागसाराक आशिल्ल्या खणींचें उदक उदक दिवचें, अशी मागणी शेतकारांनी केल्या.
सांगोड वाठारांत आदीं सुमार 200 परस अदीक शेतकार भात शेती लागवड करताले. ते खातीर कुळे पंचायत वाठारांतलया शिगांव सावन खारजांतल्यान उदक मेळोवन दिवपाची वेवस्था पुर्तुगेज काळा सावन आसा. पूण खारजाची आयज मेरेन दुरुस्ती करूंक नाशिल्ल्यान खूब कडेन उदकाची गळटी जाता. ताका लागून खूब कडेन व्हड प्रमाणांत उदक व्हांवून वता. ताका लागून सांगोड वाठारांतल्या शेतकारांक उदकाचो उणाव जाता. उदक नाशिल्ल्यान अंदूं सुमार 50 ते 60 शेतकारां मुखार संकश्ट उबें रावलां.
शेतकर संघटणेचे अध्यक्ष संतोष सांगोडकार हांणी सांगलें, खारजांतल्यान उदकाची गळटी चालूआशिल्ल्यान सांगोड वाठारांतल्या शेतकारांक उदकाचो उणाव जाला. ताका लागून खारजाची दुरुस्ती करप गरजेचें आसा.
मोलेंचे पंच विठोबा मळेकार हांणीय शेतकारां खातीर उदकाची पुरवण करपाचो यत्न करचो, अशें म्हणलां. शिंपणावळ मंत्री सुभाष शिरोडकार हांणी खारजाची दुरुस्ती करपाचें उतर दिलां, पूण ह्या वावराक वेळ वतलो. ते मेरेन बंद आशिल्ल्या खणींतलें उदक मेळोवन दिल्यार शेतकारांची समस्या सुटावी जातली, अशेंय तांणी म्हणलां. शिगांव सावन खारजांतल्यान सोडिल्लें उदक हे आदीं शिरवळ- दावकोण मेरेन आशिल्ल्या शेतांनी पावतालें. पूण फाटल्या कांय वर्सां सावन काजूमळ मेरेनूच खारजाचें उदक पावता. शिरवळ- दावकोण वाठारांतलो खारज पुराय मोडला, ताका लागून त्या वाठारांतलीं शेतां पडीक दवरल्यात. सरकारान पुराय खारजाची दुरुस्ती केली जाल्यार सुमार 500 परस अदीक शेतकारांक ताचो फायदो जातलो, अशें ह्या वाठारांतल्या शेतकारांचें म्हणणें आसा.
अधिकाऱ्यांनी केली खारजाची पळोवणी
शिंपणावळ खात्याचे कार्यकारी अभियंते कृष्णकांत पाटील आनी हेर अधिकाऱ्यांनी बिरेस्तारा सांगोड वाठारांतल्या शेतकारांची भेट घेतली आनी तांचे कडेन चर्चा केली. गळटी लागिल्ल्या खारजाची रोखडीच दुरुस्ती करतले तशेंच लागसाराक आशिल्ल्या खणींचें उदक शेतकारांक मेळोवन दितले, अशें तांणी उतर दिलें. बिरेस्तारा अधिकाऱ्यांनी पुराय खारजाची निमाण्या पोता मेरेन पळोवणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
