भांगरभूंय | प्रतिनिधी
सांगें : सांगेंच्या उच्च माध्यमीक हायस्कुलाच्या पांख्यार माकडान उडी मारिल्ल्यान फॉल्स सिलिंग कोसळ्ळें. हे घडणुकेंत पांच विद्यार्थी जखमी जाले. तीन विद्यार्थ्यांक सांगेंच्या मुळाव्या भलायकी केंद्रांत उपचार करून घरा धाडले. दोगां विद्यार्थ्यांचे तकलेक मार बशिल्ल्यान तांकां मडगांवच्या हॉस्पिसियो हॉस्पीटलांत दाखल केले.
हे विशीं सविस्तर म्हायती प्रमाण, आयज सकाळीं सवाय णवांक कांय विद्यार्थी कार्यावळीची येसाय मारपाक हॉलांत जमिल्ले. तेन्ना एका माकडान झाडा वेल्यान पांख्यार उडी मारली आनी भितर प्रवेश केलो. माकडान नेटान उडी मारिल्ल्यान तो सिलिंगा सयत भितर पडलो.
पांख्याचेर दोन उदकाच्यो टांकयो दवरिल्ल्यान त्या दोन टाकयांचे मदीं आनी दोनूय कुशीक व्हड सुवात आशिल्ल्यान थंयच्यानूच माकोड भितर आयिल्ल्याची म्हायती मुख्याध्यापक सुदेश नायक हांणी दिली.
ही सुवात बंद करपाक बांदकाम खात्यान सर्व्हेय केल्लो. मात खात्यान हाचे कडेन आड नदर केली म्हूण ही घडणूक घडली. वेळार ही वाट बंद केल्ली जाल्यार अशें जावचें नाशिल्लें अशें पालक म्हणटात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
