भांगरभूंय | प्रतिनिधी
भांगरभूंय । प्रतिनिधी
कुडचडेंः सांगें आनी केपें तालुक्यांत भाऊसाहेब बांदोडकार कासाच्या निमतान येताले. ह्या तालुक्यांतलो सैम तांणी पळयल्लो. फुडें गोंयचो मुख्यमंत्री जातगीर तांणी ह्या सैम वाठारांची पर्यटन थळ म्हणून उदरगत केली. सांगें- केपें तालुक्याचेर तांचो सामको मोग आशिल्लो. ह्या मोगाची प्रतिकां सध्या ह्या दोनूय तालुक्यांत दिश्टी पडटात अशें लक्ष्मणभाऊ मडगांवकार हांणी सांगलें.
कुडचडे दयानंद कला केंद्रान आयोजीत केल्ल्या बांदोडकार जंयती दिसा सांगे हांगा भाऊच्या पुतळयाक आंदरांजली ओपपाचे कार्यावळींत ते उलयताले. भाऊन गोंयच्या पयल्या मंत्रीमंडळान सांगे-केपेंच्या टोनी फर्नांडीस आनी वि सू करमली हांका मंत्री म्हणून घेतले. आनी ह्या दोनूय तालुक्याचे उदरगतीचीं दारां उक्ती करून दिली अशें मडगांवकारान सांगले.
सांगें तालुक्यांत साळावली धरण उबारून भाऊन पुराय गोंयाक पियेवपाच्या उदकाची वेवस्था केली हें गोंयकार केन्नाच विसरपाक शकनात. समाजाक उपेगी पडपाचीं कामां भाऊन केली. तरणाटे पिळगेन हें मतींत दवोरपाक जाय ह्या हेतान आमी दर वर्सा बांदोडकार जंयती मनयतात. भाऊ गेल्यार सध्या 50 वर्सां जाल्यांत आनी आमची संस्था फाटल्या 50 वर्सां सावन तांची जयंती आनी पूण्यतिथ मनयता अशें कला केंद्राचो अध्यक्ष मोर्तू नायक हाणे सांगलें. सांगे आनी केपें हें आमचे कार्यमळ आसलें तरी भाऊची याद करून दिवपी कार्यावळी आनी गोंयां भायर करपाचें थारायलां अशें केंद्राचो उपाध्यक्ष सुभाष चं. नायक हाणे सांगलें.
2007 वर्सा जाल्ले विधानसभा वेंचणुकेंत सांगें मतदारसंघात मगो पक्षाचे उमेदवार आशिल्ले आनंद वेळीप हाणे जंयती कार्यावळ सांग्यार आयोजीत केल्ले खातीर दयानंद कला केंद्राचे उपकार मानले. कार्यावळीची येजमानकी भाई नायक हाणे चलयली. मोहनदास देसाय, भिकू नायक, आदलो पंच वांगडी केशव नायक, सदानंद खांडेकार, राया देसाय, नवीन खांडेकार हांणी भाऊक आर्गां ओपलीं, गोविंद गावडेन उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
