भांगरभूंय | प्रतिनिधी
सांगें : सांगें म्हालांतल्या भाटी ग्रामपंचायत वाठारांतल्या शेतकारांनी रब्बी हंगामांत शेती करपाचें सोडून दिलां. हाका लागून शेत लागवडीचें प्रमाण देंवलां. हाचें मुखेल कारण म्हळ्यार चारूय वटेन नेत्रावळी अभयारण्याचें रान आनी थंयच्यान व्हडा प्रमाणांत येवपी गवे. ह्या गव्यां कडल्यान शेती आनी भाजी लागवडीची नासाडी करतात. सध्या भाटी भागांत जायत्या सुवातांचेर लोकांनी शेती करप सोडून दिलां. फकत बारीक प्रमाणांत शेतवज केल्ल्याचें दिसून येता.
भाटी वाठारांतली शेती, बागायतींत गवेरेड्यांनी कोंगारे, भाटी, मधले शेत, बेकरे, पाटे भाटच्या शेतांची वाट लायल्या. मेजक्याच सुवातांचेर शेती केल्ल्याचें दिसून येता.
एका काळार सोलये, आमडय, मुगोली ह्या वाठारांतल्यान लोक येवन शेती करताले, मात फाटल्या कांय वर्सां सावन रानवटी जनावरां पसून जावपी उपाद्रव्याक विटून शेती करप सोडून दिलां. फाटल्या कितल्याशाच वर्सां सावन मठतुडव हांगच्या पंचवाडो, राजमोलो हांगचीं शेतां पडींग पडल्यां. हाचें एकूच कारण म्हळ्यार व्हडा प्रमाणांत रानवटी जनावरांचो उपद्रव आशिल्ल्याचें शेतकारांनी सांगलें.
गवे शेतांत येवन शेतां सोंपयतात. इतलेंच न्हय व्हडा प्रमाणांत नासाडी करतात अशें भाटीच्या शेतकरी लखमु नारू गांवकार हांणी सांगलें. गव्यांनी आपली भाजीपालो लागवड सोंपोवन केल्ल्ल्याचें गावकर हांणी सांगलें. दुसरे कडेन भाटी बेकरे हांगच्या शेतांनी गवे येवन वासुदेव कुट्टीकर हांची भाजीपालो मळो, ग्रीन फोडरचे लुकसाण केल्ल्याची कागाळ आसा. गवेरेड्यांनी तांच्या भेंड्यांची नासाडी केली.
मदीं गांव आनी शेत, जाल्यार ताचे भोंवतणी रान. अशी भाटी ग्रामपंचायतीची स्थिती आसा. हाका लागून भाटी रानांतल्यान गव्यांचीं कळपांच येतात आनी बागायती आनी शेतांची नासाडी करतात. रान खात्यान तांचो बंदोबस्त करपाची मागणी शेतकार करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
