भांगरभूंय | प्रतिनिधी
मनीस जर कोळशाचे खणी लागीं गेलो आनी कोळशाक हात लायलो ना जाल्यार लेगीत कोळशाचो एक थर मनशाच्या आंगार येताच. तेचपरी मनीस अत्तराच्या दुकानांत गेलो आनी अत्तर विकतें घेतलें ना जाल्यार लेगीत अत्तराचो सुगंध त्या मनशाक लाबताच. मनीस ज्या सांगातात आसता ताचो मनशाचे जिणेचेर परिणाम जाताच. देखून मनशान ताचो सांगात सामको विचार करून करपाक जाय. मनीस हो समाजीक जीव आसा, आनी देखून आमच्या सांगाताचो परिणाम हो आमचेर जाताच. आमचे भोंवतणचे आमचे कुटुंबीय, इश्ट आमचे जिणेक, विचारांक (बरी-वायट) दिशा दितात. देखून बर्या सांगातात मनशाची उदरगत आनी वायट सांगातात मनशाचो इबाड जाता.
बरो सांगात मनशाक आदार, उर्जा, उर्बा आनी सकारात्मक विचार दिता. बेसबरी मुल्यां घेवन जगपी लोकांच्या सांगातात आशिल्ल्यान आपले मदीं लेगीत जापसालदारकेची भावना, सकारात्मकता, आत्मानुभुती ह्या सारके गूण वाडीक लागतात. हेर लोक कश्ट करून येसस्वी जातना दिश्टी पडटात तेन्ना मनीस प्रोत्साहीत जाता. बर्या सांगाताक लागून मनशाचे मानसीक अवस्थेंत सुदारणा जाता. जिणेंतल्या आव्हानांचो फुडो करपाक नव्या मानसीक बळग्यां वरवीं तयार जाता. इश्टांचो आनी सांगात्यांचो मानसीक आदार मनशाक तणाव, दुख्ख, हुस्को, एकसुरेपण ह्या सारक्या गजालीं सावन पयस रावपाक मजत करता. एक बरो सांगात मनशाक व्यक्तीगत आनी वेवसायीक मळार अदीक सकारात्मक काम करपाक उर्बा दिता. स्वता उर्जात्मक जीण जगपी लोक हेरांकूय तांचे मोखी मेरेन पावपाक प्रेरणा दितात.
दुसरे वटेन एक वायट सांगात मनशाच्या शारिरीक, मानसीक, वैचारीक, बौद्धीक, आत्मीक, सांस्कृतीक अश्या सगल्याच आयामांचेर वायट परिणाम करता. वायट संवयी लावन घेवप, वायट विचार करप अश्यो गजाली वायट संगतींत जातात. नीती-मुल्यां, तत्वां, दूरदिश्टी ह्यो गजाली मनीस विसरपाक लागता आनी पुरायपणान आत्मघाताचे वाटेर चलपाक लागता. वायट सांगात मनशाच्या मानसीकतेचेर जेन्ना परिणाम करता तेन्ना विखारी नातीं, टिका, बिघाड, इबाड आनी हे वरवीं निर्माण जावपी तणाव मनशाचे उर्जेचेर परिणाम करता. मनीस स्वताच्या तांकीचेर प्रस्न प्रस्न करपाक लागता. मनशाक स्वताचें मुल्य ना जाल्ल्याची भावना येता आनी ताचो स्वाभिमान पुराय नश्ट जाता. वायट सांगाताक लागून मनशाच्या उत्पादन क्षमतेचेर परिणाम जाता आनी मनशाच्या हातांतल्यान जायत्यो संदी पयस वतात.
एक बरो सांगात सांबाळून दवरपा खातीर लेगीत कांय गजाली आवश्यक आसतात. पयलीं म्हळ्यार बरो सांगात वळखप. मनांत वायट हेत दवरून आमचे मुखार येवपी व्यक्तीची खरी वळख आमकां जावपाक जाय. ते खातीर सूक्ष्म निरिक्षण, चिंतन आनी दरेका घटनेंतल्यान शिकपाची संवय जाय. खंयच्याय गटांत आमी आसतना त्या गटाची म्हण आशिल्ली कृती आपणे करप काय ना हाचोय विचार म्हत्वाचो थारता. व्यक्तीगत धारणा आनी समुहाची विचारसरणी हातूंत आवश्यक तेन्ना फरक करपाक कळपाक जाय. गटाची धारणा आनी कृती मनशाक ताच्या व्यक्तीगत मोखी सावन पयस व्हरपाची शक्यताय केन्ना केन्ना आसता ताचोय विचार जावपाक जाय. आयच्या गतिमान संवसारांत आनी बदलते परिस्थितींत बरो सांगात राखप हे खातीर खूब प्रमाणांत वेळ, उर्जा, यत्न खर्च करचे पडटात.
एखादो सांगात वायट आसा हें कळून लेगीत जायते फावटी तातूंतल्यान भायर सरप जायना हाचे एक मुखेल कारण म्हळ्यार संवय. काळा प्रमाण मनशाक लोकांची संवय जाता आनी तीं मनशां वायट आसात हें कळून लेगीत तें सोडप शक्य जायना. कारण मनशाक त्या लोकां विशीं एके तरेची जोडिल्लेपणाची भावना निर्माण जाल्ली आसता. सांगात वायट आसा हें लक्षांत आयलें तरी ताचो एक कम्फर्ट झोन मनशाक मेळिल्लो आसता आनी देखून तें सोडपाक जायते खेपे लोक तयार जायनात. दुसरे वटेन असो सांगात सोडिल्ल्यान समाजीक वेगळेंपण वा समाजीक बहिश्कार आपल्याचेर जायत ह्या भंयान मनीस असो सांगात सोडपाक तयार जायना. कितलेशेच खेपे आपूण वायट सांगातात आसा हेच मुळांत मनशाक समजना देखून मनीस तो वायट सांगात सोडपाक पावना.
बरो सांगात लाबचो हे खातीर आत्मभान येवप गरजेचें. आपल्या व्यक्तीमत्वाक खंयच्यो गजाली, गूण पोशक आसात हें मतींत घेवन त्या गुणांक पोशक अशे लोक सोदपाक जाय. आपूण जांच्या सांगातात आसा तांचो वेळोवेळ नियाळ आपणें घेवपाक जाय. सांगाताचो आपल्याचेर कसलो परिणाम जातलो हाचो निर्णय करपा खातीर हें परिक्षण सामकें गरजेचें. आपल्या नात्यांत स्पश्ट आनी निश्चीत शिमो आसप सामकें आवश्यक.
आपल्या तत्वांच्या आनी मुल्यांच्या विरुद्ध वचपी गजालींक न्हयकार दिवपाक आपणें सदांच तयार आसपाक जाय. कारण आपलो स्वाभिमान आनी वाडी खातीर ही गजाल सामकी म्हत्वाची आसता. जरी एखादो बरो सांगात आमकां लाबलो तरी लेगीत तसोच आनिकूय बरो सांगात सोदत रावपाची तयारी मनशान दवरपाक जाय. समाजीक गट, वेवसायीक वळखी आनी तांचें जाळें हांचे वरवीं मनशाक सकारात्मक आदार, उर्बा आनी घटाय मेळटा जी ताच्या विकासा खातीर भोव उपेगी थारता. आपूण वायट सांगातात हें लक्षांत आयल्या खिणा सावन आमी स्वताक ताचे सावन ल्हवू ल्हवू पयस करपाची सुरवात करपाक जाय. एकाच खिणाक घाव घालून तोडून उडोवपाक गेल्यार अनावश्यक परिणाम आनी गरजे भायर तणाव निर्माण जावपाची शक्यताय आसता.
एका बर्या सांगाताचो मनशाच्या जिणे वेलो परिणाम अनन्य साधारण आसा. बरो सांगात मनशाची व्यक्तीगत, भावनीक उदरगत आनी उत्पादन क्षमता वाडयता. आत्मभान, अलिप्तता आनी जाणीवपूर्वक स्वताचे जिणेक आकार दिवपाचो यत्न केल्यार मनशाक एक बरो सांगात लाबून ताचे जिणेक निश्चीत सुंदर आकार प्राप्त जावपाक शकता.
डॉ. चिन्मय मधू घैसास
9823728640
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
