भांगरभूंय | प्रतिनिधी
भांगरभूंय । प्रतिनिधी
बेळगांवः महाराष्ट्राच्या सांगली जिल्ह्यांतल्या जत तालुक्यांतल्या 40 गांवांतल्या लोकांनी तांचो आसपाव कर्नाटक राज्यांत करपाची मागणी मंगळारा बेळगांवांत घेतिल्ले पत्रकार परिशदेंत केली. फाटल्या 50 वर्सा सावन महाराष्ट्र सरकार आमचेर अन्याय करीत आसा अशें जत तालुक्यांतल्या फुडाऱ्यांनी ह्या वेळार सांगलें.
महाराष्ट्रांतले राजकी फुडारी फकत वेंचणुके वेळारून जत तालुक्यांतल्या लोकांक मेळपाक येतात. फाटल्या पांच दशकांत तांका तालुक्यांतल्या गांवातल्या लोकांक मूळाव्यो सुविधा मेळोवन दिवपाक मातूय जमलें ना असो आरोप कन्नड असोसिएशनाचो अध्यक्ष सोमलींग चौधरी हांणी केला. महाराष्ट्र राज्याची निर्मणी जाल्या सावन महाराष्ट्र सरकारान जत तालुक्या खातीर कांयच केलें ना. कर्नाटकाचो मुख्यमंत्री बसवराज बोम्मय हांणी सांगली हो कर्नाटकांचो वाठार आशिल्ल्याचो दावो करतगीर महाराष्ट्रांतले फुडाऱी जागे जाल्यात आनी आमच्या तालुक्यांत येवपाक लागल्यात अशें चौधरी हांणी सांगलें. आमच्यो समस्या सासणाच्यो सुटाव्यो जावचो अशें आमका दिसता आनी ते खातीर आमकां मजत करची अशें आमी बोम्मय हांचे कडेन मागतात अशें तांणी सांगलें.
बेळगांवांतली महाराष्ट्र एकीकरण समिती बेळगांव महाराष्ट्रांत घालपाची मागणी करतात मात जत तालुक्यांतल्या लोकांची कर्नाटकांत येवपाची इत्सा आसा अशें कर्नाटक नव निर्माण पडेचो राज्य अध्यक्ष भीमाशंकर पाटील हांणी सांगलें. जत सारक्या कन्नडींग लोकांचो चड आसपाव आशिल्ल्या तालुक्या कडेन महाराष्ट्र सरकाराची आडनदर जाता ताका लागून ही परिस्थिती आयल्या असो दावो तांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
