भांगरभूंय | प्रतिनिधी
पुण्यांतल्या खून प्रकरणांतलो घोव गोंयांत करतालो गवंडी काम
सांगली, खबरां संस्था: शिरोळ म्हालांतल्या धरणगुत्ती अनैतीक संबंधांत आडखळ थारिल्ल्यान बायलेन इश्टाचे मजतीन आपल्या घोवाचो खून करून कूड मसंडभूंयेंत व्हरून पुरिल्ल्याची भिरांकूळ घडणूक उक्ताडार आयली. संजय अल्लाबक्ष शिकलगार (३८, मूळ जयसिंगपूर, सध्या लक्ष्मीनगर धरणगुत्ती) अशें मरण आयिल्ल्याचें नांव. संजय हाका कोयत्यान वार करून मारलो. २७ फेब्रुवारीक लिंगायत मसंडभूंये लागसारा ताका मारतकच रोखडोच लिंगायत मसंडभूयेंत ताची कूड पुरली.
शिरोळ पुलिसांनी दुबावितांक ताब्यांत घेवन खुनाची म्हायती घेतले उपरांत घडणुके सुवातेर वचून पुरिल्ली कूड भायर काडली. ह्या प्रकरणांत बायल दीपा संजय शिकलगार (३५, रा. लक्ष्मीनगर धरणगुत्ती), तिचो इश्ट दर्शन भगवान कांबळे (३६), इश्टाचो भाव अमृत भगवान कांबळे आनी इश्टाचो चुलतो स्वागत विजय कांबळे (तिघे रा. धरणगुत्ती, ता. शिरोळ) हांचे आड शिरोळ पुलिशेंत गुन्यांव दाखल केलो.
गोंयांत गवंडी काम करतालो
संजय शिकलगार फाटल्या देड वर्सा सावन गोंयांत गवंडी म्हणून काम करतालो. २६ फेब्रुवारीक संजय गोंयच्यान जयसिंगपूर हांगा आयिल्लो. फाटल्या कांय दिसां सावन ताची बायल दीपा आनी दर्शन हांचे मदीं अनैतीक संबंध आशिल्ले. हाचेवेल्यान घोव-बायले मदीं सेगीत वाद सुरू आशिल्लो. घोव आपल्या अनैतीक संबंदान आडखळ जाल्ल्यान बायल आनी तिच्या इश्टान मेळून संजयाचो कांटो काडलो.
पुण्यांतूय खून
पिंपरी-चिंचवड पुलीस स्टेशनाचे हद्दींत डुडुळगांवांत २८ फेब्रुवारीक आमुसाब साहेबलाल मुल्ला (३४) हाचो धारेच्या शस्त्राचे मजतीन पोटाचेर वार करून खून केल्ल्याचो प्रकार उक्तडार आयलो. ह्या प्रकरणांत पुलिसांनी मरण आयिल्ल्याची बायले सयत तिच्या इश्टाक उत्तर प्रदेशांतल्यान अटक केली.
अब्दुल मकबूल मलीक (४५, रा. डुडुळगांव, पुणे, मुळ उत्तर प्रदेश) आनी जेबा अमुदसाब मुल्ला (३०) अशीं ह्या प्रकरणांत अटक केल्ल्या दुबावितांचीं नांवां. हे विशीं तिगां जाणांचेर गुन्यांव दाखल केलो. गुन्यांवाचो तपास करतना कसलोच पुरावो सांपड नाशिल्लो. आरोपी आड पुरावो सोदपाचें काम आव्हानात्मक आशिल्लें. तांत्रीक विश्लेशणात्मक तपास करूनय म्हायती सांपडनाशिल्ली. हाका लागून पुलिसांनी थळाव्या नागरिकां कडेन चवकशी करीत ह्या वाठारांतली सीसीटीव्ही फुटेजची पळोवणी केली. तेन्ना मरण आयिल्ल्यांच्या घरा शेजराक रावपी भंगार वेवसायीक दुबावीत हो घडणुके दिसा सकाळ सावन ताच्या उत्तर प्रदेशांतल्या गोंडा ह्या मूळ गांवांत गेल्ल्याचें समजलें. ते प्रमाण पुलिसांनी उत्तर प्रदेशच्यान दोगांकूय अटक करून पुण्यांत हाडिल्ल्याचें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
