भांगरभूंय | प्रतिनिधी
लोकांनी व्हाळांत कोयर उडोवचो न्हय; नगराध्यक्षाचें आवाहन
दिवचल: देसायनगर सावन सकयल गोकुळवाडी सांखळी मेरेन आशिल्ल्या व्हाळांत व्हड प्रमाणांत लोकांनी उडयिल्लो कोयर, कापिल्लीं झोपां आनी माडाचीं चुडटां आडकल्ल्यान उदक व्हाळा भायर येवन शारांत पावलें. मंगळारा सकाळीं नगराध्यक्षा सिद्धी प्रभू हांणी ह्या वाठाराची पळोवणी केली आनी रोखडीच व्हाळाची नितळसाण करपाची सुचोवणी केली. तशेंच दोन कडेन व्हांवून गेल्ल्या देसायनगरांत वचपी रस्त्याची डागडुजी करपाची सुचोवणी प्रभू हांणी केली.
सोमारा दनपारां एक वर पडिल्ल्या नेटाच्या पावसाक लागून गोकुळवाडी सांखळे व्हाळांतल्यान व्हड प्रमाणांत उदक भायर येवन रस्त्या वेल्यान व्हांवूंक लागलें. छत्रपती शिवाजी महाराज चौक वाठाराक न्हंयेचें स्वरूप आयिल्लें. ह्या उदकाच्या लोटाक लागून देसायनगरांत वचपी रस्त्याच्यो कडो दोन कडेन व्हांवून रस्तो असुरक्षीत जालो. तशेंच पांच दुकानांनी चिखलान भरिल्लें उदक गेल्ल्यान तांचें लुकसाण जालें. रस्त्यार सगली कडेन फातर, माती सांचिल्ली. येरादारी आडाविल्ली.
उदक व्हांवून गेले उपरांत ह्या व्हाळांत व्हड प्रमाणांत माती, फातर, कापिल्लीं झाडां आनी कोयर सांचिल्ल्याचें नदरेक पडलें. हाका लागून व्हाळाचे दोन कडेन तोंड बंद जालें आनी उदक व्हाळा भायर आयलें. तेच बरोबर पावसूय सुमार वरभर आनी व्हड प्रमाणांत पडिल्ल्यान उदकाचो एकूच लोट सकयल आयिल्लो. ह्या वाठारांत पयलेच फावटी अशे तरेचो उदकाचो अणभव लोकांनी पळयलो.
ह्या वाठाराची काल नगराध्यक्षा सिद्धी प्रभू, उपनगराध्यक्ष आनंद काणेकार, नगरसेवक दयानंद बोर्येकार हांणी पळोवणी केली. सद्या माती आनी फातर, कोयरान भरिल्लो व्हाळ प्राधान्यान नितळ करपाची सुचोवणी नगराध्यक्षा सिद्धी प्रभू हांणी दिली. तशेंच व्हांवून गेल्लो रस्तो वाहन चालकांचे सुरक्षीतताये खातीर पूर्वपदार हाडपा खातीर काम सुरू करपाची सुचोवणी केली. फुडारांत अशे तरेची घडणूक घडची न्हय आनी लोकांक त्रास जावचो न्हय हे खातीर खबरदारी घेतले अशेंय प्रभू हांणी सांगलें.
सांखळी नगरपालिका नितळसाणीचे नदरेन सगली ती खबरदारी घेता. मॉन्सुनपूर्व कामांय वेवस्थीत जाल्यांत. पूण लोकांनी व्हाळांत, गटारांनी कोयर, माडाचीं चुडटां, कापिल्लीं झोपां उडयत आशिल्ल्यान हो सगलो कोयर व्हाळांत आडकून उरता आनी उदकाची वाट बंद जाता. हाचो परिणाम पयर जाल्ल्या प्रकारांत घडटा. ते खातीर लोकांनी लेगीत जबाबदारीन वागतना कोयरा बरोबर कापिल्लीं झाडां, मांडाचीं चुडटां पालिके कडेन दिवचीं अशें आवाहन नगराध्यक्षा सिद्धी प्रभू हांणी ह्या वेळार केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
