भांगरभूंय | प्रतिनिधी
पांच वरां काडलो घाम; देसायनगरांत भिरांतीचें वातावरण
भांगरभूंय । प्रतिनिधी
दिवचलः शुक्रारा 24 फेब्रुवारीक सांखळे देसायनगरांत गव्यांनी घुमाकूळ घातलो. लोकवसतेंत आयिल्ल्या दोन गव्यांनी सुमार पांच वरां रान खात्याचे अधिकारी, प्राणी मित्र आनी थळाव्यांक घाम काडलो. पांच वरांच्या खर यत्नां उपरांत तांकां थंयच्यान धांवडावन घालपाक येस आयलें.
सकाळीं 7 वरांच्या सुमाराक देसायनगरांत दोन गवे दाखल जाले. लोकांक पळयताच ते आबूज जाले, तशेंच तांकां पळोवन लोकूय भियेले. ते उपरांत थंय प्राणीमित्र आयले आनी गव्यांक थंयच्यान धांवडावन घालपाचो यत्न केलो. पूण ते गवे तांकां कशेच बदले नात. दनपारा उपरांत लोकवसतींतल्यान त्या गव्याचे जोडयेक धांवडावन घालपाक येस आयलें. ह्या वेळार जीव मुठींत घेवन पळोवप्यांनी गर्दी केल्ली.
रान विभागाचो पंगड तशेंच गव्यांक धांवडावन घालपी पंगडान येवन खूब वरां खर यत्न केले. दनपारां तांकां धांवडावन घातले तरीय रानवटी जनावरां लोकवस्तींत अन्नाच्या सोदांत येवपाक लागिल्ल्यान लोक भियेल्यात. फुडारांत रानवटी प्राणी आनी मनीस हांचे मदलो संघर्श तेंगशेर पावपाक शकता, अशी प्रतिक्रिया प्राणीमित्र अमृत सिंह हांणी उक्तायली. उदरगतीच्या नांवा खाला रानसंपदा, झाडां- पेडां नश्ट करपाचें कारस्थान सुरू आसा. धा झाडां मारपाचीं परवानगी घेवन शेंकड्यांनी झाडां मारतात. ताका लागून रान विभाग अधिकाऱ्यांनी हे बाबतींत विशेश लक्ष दिवपाची गरज आसा. रानां नश्ट जालीं जाल्यार रानवटी जनावरां लोकवसतींत घुसून मनशांचें लुकसाण करपाची शक्यताय आसा. देसायनगरांत आयिल्ले गवे हो ताचोच एक भाग आसा. फुडारांत हो संघर्श आनीक खर जावपाची लक्षणां आसात, अशेंय अमृत सिंह हांणी सांगलें.
वाळपय विद्यालया लागसार गव्यांचो वावर
वाळपयः वाळपच्या जवाहर नवोदय विद्यालयाच्या संपर्क रस्त्याचेर फाटल्या कांय दिसां सावन गव्यांचो वावर वाडला. फाटल्या 15 दिसां सावन ह्या रस्त्याचेर नेमान एक गवो दिसता. ह्या विद्यालयांत पालक आनी हेर नागरीक सद्दां येतात- वतात. ह्या गव्याक लागून धोको निर्माण जाला. रान खात्यान हाची गंभीर दखल घेवन ताचो बंदोबस्त करचो, अशी मागणी थळाव्या लोकांनी केल्या. विद्यालया लागसार वावुरपी गव्याक लागून शिक्षकांनी हुस्को उक्तायला. शिक्षक वर्ग आनी कर्मचारी वर्ग नेमान वाळपय बाजारांत वचपा खातीर ह्या रस्त्याचो वापर करतात. ताका लागून तांच्या जिवाक ह्या गव्या पासून धोको निर्माण जावपाक शकता. जवाहर नवोदय विद्यालया भोंवतणी रान आसा. ह्या रानांत गव्यांचो वावर वाडला, अशी म्हायती शिक्षकांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
