भांगरभूंय | प्रतिनिधी
प्रा. पं. राम बोरगांवकर हांचो सत्कार
भांगरभूंय । प्रतिनिधी
केरी-सत्तरी : सरस्वती संगीत म्हाविद्यालय लातूर, राधाकृष्ण संगीत अकादमी सांखळी आनी हावसींग बोर्ड रेसिडंट असोसिएशन हरवळें हांच्या जोडपालवान सांखळेच्या श्री महालक्ष्मी देवस्थानाच्या सभाघरांत शास्त्रीय संगीत सुवाळो जालो. सरस्वती संगीत महाविद्यालयाच्या लातूरच्या अमृत महोत्सवी वर्सा निमतान ही कार्यावळ आयोजीत केल्ली.
हे कार्यावळीचें उक्तावण सरस्वती संगीत महाविद्यालयाचे प्राचार्य तालमणी पं. राम बोरगांवकर आनी गोंयचे नामनेचे तबलावादक पं. तुळशीदास नावेलकार हांचे हस्तुकीं जालें. ह्या वेळार माचयेर राधाकृष्ण संगीत अकादमीचे संस्थापक गुरूवर्य रामचंद्र नायक, अध्यक्ष प्रा. संतोष मळीक, सचीव दत्ताराम माडकार, भांडारी अनील जल्मी, देवस्थानचे अध्यक्ष संतोष भगत, प्रभानंद पाडलोस्कार, महादेव देसाय, सांखळेची नगराध्यक्ष सिद्धी प्रभू परोब, माधव बोडके हाजीर आशिल्ले.
ह्या वेळार अखील भारतीय गांधर्व म्हाविद्यलय म्हामंडळ मुंबयचे डिसेंबर 2024 त घेतिल्ले परिक्षेंत पास जाल्ल्या राधाकृष्ण संगीत अकादमीच्या 75 विद्यार्थ्यांक मानेस्तां हस्तुकीं प्रमाणपत्रां भेटयलीं. हे सगळे विद्यार्थी रामचंद्र नायक हांचे कडेन मार्गदर्शन घेतात.
ह्या सुवाळ्यांत पं. तुळशीदार नावेलकार हांचे हस्तुकीं प्राचार्य पं. राम बोरगांवकर हांचो शाल, नाल्ल आनी सरस्वती देवीची मूर्त दिवन सत्कार केलो.
अकादमीचे अध्यक्ष प्रा. मळीक हांणी येवकार दिलो. पं. नावेलकार आनी पं. बोरगांवकार हांणी विद्यार्थ्यांक मार्गदर्शन केलें.
शास्त्रीय संगीत सुवाळ्यांत अनुजा आनी अनुष्का रामचंद्र नायक ह्या भयणींनी शाम कल्याण रागांत बडा ख्याल, दृत बंदीश आनी तराणा सादर केलो. तांकां पेटयेर भास्कर गांवस आनी तबल्याचेर वासुदेव च्यारी हांणी साथसंगत केली. परांत गुरुदास गांवकार हाणें राग नायकी कानडांत बडा ख्याल आनी दृत बंदीश सादर केली. ताका पेटयेर गोपीनाथ गांवस आनी तबल्यार गोविंद गांवस हांणी संगीतसाथ केली. वासुदेव च्यारी हाणें रुपक तालांत तबला एकलवादन केलें. ताका नगमासाथ भास्कर गांवस हांणी केली.
अकादमीचे संस्थापक रामचंद्र नायक हांच्या गायनान सुवाळ्याची सांगता केली. तांणी राग यमनांत बडा ख्याल, दृत बंदीश, तराणा सादर केलो आनी भवानी दयानी ही भैरवी सादर केली. तांकां पेटयेर स्मितल मळीक आनी तबल्याचेर मिलिंद परब हांणी साथ दिली. पुराय कार्यावळीचें सुत्रसंचालन संजय सालेलकार हांणी केलें. संस्थापक रामचंद्र नायक हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
