सांखळे बाजारांतल्या दुकानांक उजो: सुमार ४० लाखांचें लुकसाण

भांगरभूंय | प्रतिनिधी

पणजी : सांखळे बाजारांतल्या दुकानांक सोमारा मध्यानराती उजो लागपाची घडणूक घडली. ह्या उज्यांत तीन दुकानां लासून गोबर जालीं. हो उजो इतलो भिरांकूळ आशिल्लो, तातुंतल्यान येवपी उज्याचे लोट आनी धुंवर पयस मेरेन दिसताले. हाका लागून ह्या वाठारांत भंयाचें वातावरण निर्माण जालें. हे घडणुकेंत सुमार ४० लाख रुपयांचें लुकसाण जालें.
ह्या उज्यांत रुपेश काणेकार हांचें मसाला आनी किराणा दुकान, तशेंच सुभाष परब हांचें कपड्यांचें दुकान पुरायेन लासून गोबोर जालें. राजेंद्र पांगम हांच्या जनरल स्टोअराकूय उजो लागलो. हे घडणुकेची म्हायती मेळटांच दिवचल उजो पालोवपी दळाचे जवान रोखडेच घडणुके सुवातेर दाखल जाले आनी उजो नियंत्रणांत हाडलो. तांच्या खर यत्नांक लागून कोट्यांनी रुपयांची मालमत्ता वाटयली.

हे घडणुकेची म्हायती मेळटांच मुख्यमंत्री डॉ. प्रमोद सावंत हांणी बेगोबेग घडणुके सुवातेक भेट दिवन पळोवणी केली आनी लुकसाण जाल्ल्यांक धीर दिलो. ह्या वेळार तांणी लुकसाण जाल्ल्याचो अदमास घेतलो आनी लुकसाण जाल्ल्यांक योग्य ती भरपाय मेळोवन दिवपा खातीर सरकार यत्न करतलें, अशें आस्वासन दिलें. फुडाराक अशे तरेच्यो घडणुको परत घडच्यो न्हय म्हूण गरजेचे उपाय काडपाचे भर दितले अशें सांगून हे घडणुके फाटलें नेमणें कारण सोदून काडपाचे आदेशूय तांणी दिले.