भांगरभूंय | प्रतिनिधी
23 आनी 24 नोव्हेंबराक सांखळेच्या रवीन्द्र भवनांत सादरीकरण
भांगरभूंय । प्रतिनिधी
दिवचलः गोंयांतलो पयलोच गोंयच्या परंपरीक आनी सांस्कृतीक लोकनाट्यांचेर उडवाड घालपी ‘लोकनाट्य महोत्सव’ सांखळेच्या रवीन्द्र भवनांत शेनवारा 23 आनी आयतारा 24 नोव्हेंबराक जातलो. कोंकणी संगीत नाटक अकादेमी, कला आनी संस्कृती खातें, रवीन्द्र भवन सांखळी, गोवा कोंकणी अकादेमी, इंदिरा गांधी राष्ट्रीय सांस्कृतीक केंद्र सांखळी, कोंकणी सेवा केंद्र सांखळी हांच्या जोडपालवान ह्या महोत्सवाचें आयोजन केलां, अशी म्हायती महोत्सवाचे कार्याध्यक्ष झिलू गांवकार आनी येवकार अध्यक्ष रवीन्द्र भवनाचे उपाध्यक्ष दत्ताराम चिमुलकार हांणी पत्रकार परिशदेंत दिली.
गोंयांत पयलेच खेपे असो इतिहासीक लोकनाट्य महोत्सव जातलो. असो उपक्रम गोंयांत आयज मेरेन जावंक ना. गोंयची विवीध लोकनाट्यां एकेच माचयेर हाडून तांचें सादरीकरण जावंक ना. गोंयांत खूबशीं लोकनाट्यां आसात, पूण आयज तीं नानपयत जावपाचे वाटेर आसात. ही लोकनाट्य परंपरा आमचे फुडले पिळगे मेरेन तशेंच अभ्यासकां मेरेन पावची ह्या उद्देशान हो लोकनाट्य महोत्सव आयोजीत केला, अशी म्हायती झिलू गांवकार हांणी दिली.
ह्या लोकनाट्य महोत्सवाचें उक्तावण शेनवारा सांजेच्या 4.30 वरांचेर जातलें. ह्या सुवाळ्याक उद्घाटक म्हूण पद्मश्री विनायक खेडेकार हाजीर रावतले. मुखेल सोयरे म्हूण मुख्यमंत्री डॉ. प्रमोद सावंत, खास निमंत्रीत म्हूण कला आनी संस्कृती संचालनालयाचे संचालक सगूण वेळीप, कोंकणी अकादेमीचे अध्यक्ष वसंत सावंत, इंदिरा गांधी राष्ट्रीय सांस्कृतीक केंद्राचे संचालक डॉ. अरूण रेड्डी, सांखळी रवीन्द्र भवनाचे उपाध्यक्ष दत्ताराम चिमुलकार उपस्थीत आसतले. जाल्यार समारोप सुवाळ्याक मुखेल सोयरी म्हीम समाज वावुरपी सुलक्षणा सावंत, जिल्हो पंचायत वांगडी गोपाळ सुर्लकार, कोंकणी अकादेमीचे अध्यक्ष वसंत सावंत, रवीन्द्र भवनाचे उपाध्यक्ष दत्ताराम चिमुलकार, सांखळी कोंकणी सेवा केंद्राचे अध्यक्ष राजन शेट्ये आनी हेर मानेस्त हाजीर रावतले. हे पत्रकार परिशदेक आयोजन समितीचे सचीव पंढरीनाथ परब, सांखळी कोंकणी सेवा केंद्राचे अध्यक्ष राजन शेट्ये, रवीन्द्र भवनाचे संचालक सुनील फाळकार, रविराज च्यारी, लक्षराज आमोणकार आनी सुखलाल दातये हाजीर आशिल्ले.
वैचारीक पद्दतीचो महोत्सव थारतलोः गांवकार
गोंयांतल्या लोकनाट्यांचेर अभ्यास जावचो. ती सादर करपी कलाकारांक उर्बा मेळची हो ह्या महोत्सवाचो हेतू आसा. तातूंत काणकोणचो खेळ, सत्तरीचे रणमाले, सांखळीचें लळीत, जांबावलीचो कालो, फोंड्याचो जागर आनी पेडणेंच्यो धालो सादर जातल्यो. हो फक्त एक उत्सव नासून तातूंत विचारांची देवाण- घेवाण जातली. ह्या लोकनाट्यांच्या सादरीकरणा वांगडाच ह्या लोकनाट्यांचेर साहित्यीक, लोकनाट्य अभ्यासकांचे परिसंवाद जातले. ह्या लोकनाट्यांचेर अभ्यास केल्ल्या तज्ञ लोक आपल्या अभ्यासाचीं कागदपत्रां सादर करतले. अशे तरेन ह्या सगळ्या लोकनाट्यांची फाटपुरवण करून तांची फाटभूंय सांगपी हो वैचारीक पद्दतीचो लोकनाट्य महोत्सव थारतलो, अशें झिलू गांवकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
