सांखळे नगरपालिकेची प्रभाग फेररचणूक याचिका भायरावाची

भांगरभूंय | प्रतिनिधी

राज्य वेंचणूक आयोगाची खंडपिठांत मागणी

पणजी: सगल्यो कायदेशीर प्रक्रिया करून सांखळे नगरपालिकेचे वेंचणुके खातीर प्रभाग फेररचणूक केल्या. तशेंच याचिकेंत उपस्थीत केल्ल्या मुद्यांक तथ्य ना. ताका लागून याचिका भायरावची अशी मागणी राज्य वेंचणूक आयोगान मुंबय उच्च न्यायालयाच्या गोंय खंडपिठा कडेन केल्या.

ह्या प्रकरणांत सांखळेचे नगराध्यक्ष राजेश सावळ आनी प्रवीण ब्लॅगन हांणी याचिका दाखल केल्या. हातूंत तांणी गोंय सरकार, नगरपालिका प्रशासन संचालनालय, दिवचलचे मामलेदार तशेंच वेंचणूक नोंदणी अधिकारी, गोंय राज्य वेंचणूक आयोग, सांखळी पालिकेचे मुख्याधिकारी हांकां प्रतिवादी केल्यात.

ह्या प्रकरणांत राज्य वेंचणूक आयोगान 28 फेब्रुवारी 2023 दिसा नोटीस जारी करून सांखळी नगरपालिकेचो फेररचणूक मसुदो नागरिकांचे हरकती खातीर दवरिल्लो. हे खातीर आयोगान दिवचलचे मामलेदार हांची वेंचणूक नोंदणी अधिकारी म्हूण नेमणूक केल्ली. ते प्रमाण सांखळेच्या मुख्याधिकाऱ्यान नागरिकांचे हरकती खातीर फेररचणूक मसुदो दवरला. ते प्रमाण 10 आनी 13 मार्च दिसा याचिकादारांनी मसुद्याक विरोधी करून हरकती नोंद केल्यात. अशें आसतना दिवचलचे मामलेदार आनी वेंचणूक नोंदणी अधिकारी हांणी हरकती भायरायिल्ल्यो आनी आदेश जारी केला. याचिकादारान खंडपिठांत याचिका दाखल करून प्रभाग फेररचणूक आदेश रद्द करपाची मागणी केल्या.

हाचे बगर राज्य वेंचणूक आयोगान मे म्हयन्यांत सांखळी पालिकेची वेंचणूक घेवपा खातीर प्रक्रिया सुरू केल्या. ह्या वेळार राज्य वेंचणूक आयोगान अंदूं 13 वयल्यान 12 प्रभाग केल्यात. सांखळी पालिकेच्या प्रभागांनी आरक्षण आनी फेरबदलाचो उद्देश मोडून उडोवपा खातीर ही दुरुस्ती केल्ल्याचो दावो याचिकादारांनी खंडपिठांत केला.

ह्या प्रकरणांत खंडपिठान राज्य वेंचणूक आयोगान नोटीस दिवन बाजू मांडपाक सांगिल्लें. ते प्रमाण मे म्हयन्यांत वेंचणुको घेवपा खातीर आयोगान प्रक्रिया सुरू केल्या. ते खातीर 8 डिसेंबर 2022 दिसा दिवचलचे मामलेदार हांची वेंचणूक नोंदणी अधिकारी म्हूण नेमणूक केल्ली.

मजगतीं, 21 फेब्रुवारी 2023 दिसा नगरपालिका प्रशासन संचालनालय सांखळी पालिकेचे वेंचणुके खातीर 12 प्रभाग निश्चीत केले. ते प्रमाण 28 फेब्रुवारी 23 दिसा प्रभाग फेररचणूक करपा खातीर मसुदो नागरिकांचे हरकती खातीर दवरलो. नागरिकांनी तशेंच याचिकादारान दाखल केल्ल्या हरकतींची दखल घेवन 16 मार्च 2023 दिसा कायदेशीर प्रक्रिया करून उपरांत प्रभाग फेररचणूक केल्ल्याची म्हायती आयोगाचे सचीव आयीशा वायंगणकार हांणी प्रतिज्ञापत्र दाखल करून खंडपिठांत म्हायती दिली. तशेंच संबंदीत याचिका भायरावपाची मागणी केल्या.