भांगरभूंय | प्रतिनिधी
दिवचल आनी सत्तरी म्हाल मर्यादीत; 18 नाटकांचो आस्पाव
भांगरभूंय । प्रतिनिधी
सांखळी : सांखळी रवींद्र भवन आनी गोवा कोंकणी अकादेमी हांच्या जोडपालवान पयली सत्तरी आनी दिवचल म्हाल मर्यादीत कोंकणी नाटक सर्तीक बिरेस्तारा 6 नोव्हेंबराक, सांजेच्या 6.45 वरांचेर सांखळी रवींद्र भवनांत जातलें. ह्या सुवाळ्याक मुखेल सोयरे म्हूण मुख्यमंत्री डॉ. प्रमोद सावंत आनी मानाचे सोयरे म्हूण नामनेचे कोंकणी लेखक पुंडलीक नायक हाजीर रावतले.
सांखळी रवींद्र भवना वतीन पोरूं सांखळी मतदारसंघ मर्यादीत मराठी नाटक सर्त आयोजीत केल्ली. हे नाटक सर्तीक सगल्या पंचायतींतल्यान नाटक पंगडांनी वांटो घेतिल्लो. खुबूच दर्जात्मक नाटकां प्रेक्षकांक पळोवपाक मेळिल्ली. हे नाटक सर्तीचें खाशेलपण म्हणल्यार सगले कलाकार त्या- त्या पंचायतींतलेच आशिल्ले. भायलो एकूय कलाकार आयात करूंक नाशिल्लो. तसो नेमूच सांखळी रवींद्र भवानन वतीन दवरिल्लो.
अंदूं सांखळी रवींद्र भवन आनी गोवा कोंकणी अकादेमी हांच्या जोडपालवान दिवचल आनी सत्तरी म्हाल मर्यादीत कोंकणी नाटक सर्तीचें आयोजन केलां. हे नाटक सर्तींत दोनूय म्हालांतल्यान वट्ट 18 नाट्य संस्थांनी वांटो घेतला.
बिरेस्तारा 6 नोव्हेंबराक सर्तीचें उक्तावण जाले उपरांत मठ युनायटेड भितरली पेठ दिवचल वतीन वैभव कवळेंकार हांणी बरयिल्लें ‘तोणी’ नाटक सादर करतले. शुक्रारा 7 नोव्हेंबराक सियावर राम पिळगांव दिवचल वतीन वैभव कवळेंकार हांणी बरयिल्लें ‘मोगपर्व’ सादर जातलें. शेनवारा 8 नोव्हेंबराक श्री भुमिका नाट्यमंडळा वतीन ‘शिमे वयल्यान फाटीं सर’ नाटक सादर करतले. 10 नोव्हेंबराक व्हाळशी स्पोर्ट्स आनी सांस्कृतीक क्लब व्हाळशी बोड्डें दिवचल हांचे वतीन संयज नंदा फाळकार हांणी बरयिल्लें ‘ती येता गे’, 11 नोव्हेंबराक श्री मात्राई कालभैरव महिला नाट्य मंडळ देवूळवाडो लामगांव दिवचल हे संस्थे वतीन महेंश चंद्रकांत नायक हांणी बरयिल्लें ‘आंगश्यो मांगश्यो’, 12 नोव्हेंबराक श्री रवळनाथ महालक्ष्मी कल्चरल क्लब विर्डी सांखळी वतीन डॉ. प्रकाश वजरीकार हांणी बरयिल्लें ‘तो एक दीस’, 13 नोव्हेंबराक श्री निरंकारी कला मंच बांबर नानोडें सत्तरी वतीन डॉ. जयंती नायक हांणी बरयिल्लें ‘काल माया’ हें नाटक सादर जातलें.
14 नोव्हेंबराक श्री सांतेरी कला मंच, मोर्लें सत्तरी वतीन डॉ. प्रकाश वजरीकार हांणी बरयिल्लें ‘काणी तशी जुनीच पूण…’, 15 नोव्हेंबराक श्री विठ्ठल मंच सांगाती कारापूर तिस्क सांखळी वतीन पुंडलीक नायक हांणी बरयिल्लें ‘चतुरंगा’, 17 नोव्हेंबराक भूमी प्रकाशन संस्थे वतीन झिलू गांवकार हांणी बरयिल्लें ‘अस्तुरी’, 18 नोव्हेंबराक कला अविश्कार मासोड्डें वाळपय सत्तरी वतीन डॉ. प्रकाश वजरीकार हांणी बरयिल्लें ‘होमखण’, 19 नोव्हेंबराक श्री सांतेरी ब्राह्मण संस्था वाळपय सत्तरी ही संस्था ‘काणी तकल्यांची’ हें नाटक सादर करतली, जाल्यार 20 नोव्हेंबराक श्री लक्ष्मीनारायण कला आनी सांस्कृतीक मंडळ न्हावेली ही संस्था ‘फायनल ड्राफ्ट’ नाटक सादर करतली.
21 नोव्हेंबराक श्रीदेवी माऊली कला क्रिडा आनी सांस्कृतीक मंडळ मेणकुरें दिवचल हांचे वतीन कीर्ती शाम नर्से हांणी बरयिल्लें ‘अल्पविराम’, 24 नोव्हेंबराक गोरी नंदन थिएटर सत्तरी गोवा हांचे वतीन ‘कोडे’, 25 नोव्हेंबराक ग्रामीण कला आनी सांस्कृतीक संस्था दाबोस सत्तरी हांचे वतीन डॉ. प्रकाश वजरीकार हांणी बरयिल्लें ‘भविष्य पुराण’, 26 नोव्हेंबराक नटरंग क्रिएशन नार्वे दिवचल हांचे वतीन ‘हिडो निस्ट’ आनी 27 नोव्हेंबराक अभय थिएटर अकादमी सुर्ल सांखळी संस्था ‘रंग सूत्र’ हें नाटक सादर करतली. सगलीं नाटकां रवींद्र भवनाच्या पं. मनोहरबुवा शिरगांवकार सभाघरांत सांजेच्या 7 वरांचेर सुरू जातलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
