भांगरभूंय | प्रतिनिधी
आमोणेंच्या 70 कलाकारांच्या पंगडान केलें उत्कृश्ठ नाटक सादर
दिवचल: रवींद्र भवन सांखळे वतीन शिवजयंती निमतान आयोजीत सवेश नाट्य सर्तींत सिंहगड आमोणा हांगचे ‘आकाश मिठी’ ह्या इतिहासीक नाट्य प्रवेशाक पयलें 30 हजार रुपयांचें इनाम फावो जालें.
रवींद्र भवनांत आयोजीत हे सवेश नाट्य सर्तींत सांखळे मतदार संघांतल्या णव पंगडांनी वांटो घेवन उत्कृश्ठ सादरीकरण केलें. उक्तावण सुवाळ्याक मुख्यमंत्री डॉ. प्रमोद सावंत, उपाध्यक्ष विठोबा घाडी, सरपंच कृष्णा गांवस, स्वाती माईणकार आनी हेर वांगडी हाजीर आशिल्ले.
हे सर्तीचें दुसरें इनाम शिवा नगर जंजिरा हरवळे, तिसरें रायगड (रायगड, वेळगें) हांकां फावो जालें. उत्कृश्ठ दादलो भुमिका रोहन घाडी (सिंहगड, आमोणा), उत्कृश्ठ बायलेचे भुमिके खातीर सुप्रिया नायक (सिंहगड, आमोणा), बालकलाकार प्रसिद्धी वेलिंगकार (शिवनगर जंजिरा गड, हरवळें) हांची नेमणूक इनामां खातीर जाली.
सरपंच कृष्णा गांवस हांच्या फुडारपणा खाला ही कार्यावळ येसस्वी जावपाक पंचायत वांगड्यांनी सहकार्य केलें. श्रीनिवास उसगांवकार हांणी दिग्दर्शन, संजय आमोणकार हांणी सहायक दिग्दर्शन केलें. दादलो आनी बायलां वांगड्यांनी उत्कृश्ठ अभिनय सादर केलो.
कृष्णा गांवस हांणी सगळ्या कालाकारांक परबीं भेटोवन माची उपलब्ध करून कला सादर करपाची संद आयोजकांनी दिल्ल्यान आमोणेच्या सुमार 70 जाणांक तांचे भितरलो अभिनय सादर करपाक मेळ्ळो, अशें सांगलें.
इनामां भेटवण कार्यावळीक उपाध्यक्ष विठोबा घाडी, दामोदर सातोडकार, स्वाती माईणकार, सुनील सिनारी, कृष्णा गांवस, पांडुरंग कुट्टीकार आनी हेर हाजीर आशिल्ले.
विठोबा घाडी हांणी गांवगिर्या कलाकारांक माची उपलब्ध जावची, तांचे भितरली कला सगळ्यांक पळोवपाक मेळची आनी हातुंतल्यान इतिहासाची जाणीव नवे पिळगेक जावची हो हेत ही कार्यावळी आयोजीत करपा फाटलो आशिल्ल्याचें तांणी सांगलें.
ह्या वेळार शिवाजी महाराजांचो जल्म सुवाळो व्हडा उमेदीन मनयलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
