भांगरभूंय | प्रतिनिधी
पणजी: म्हापशेंच्या प्रियांका डान्स अकादमी वतीन हालींच ‘अरंगेत्रम’ ह्या भरतनाट्यम नाच प्रशिक्षणांतलें निमाणें नाच सादरीकरण (निमाणी परिक्षा) सांखळेच्या रवींद्र भवनांत जालें.
म्हापशेंच्या दुर्वा वासुदेव शेट्ये आनी तारिनी अश्वीन कुमार प्रभू फाटल्या सात वर्सां वयर डान्स अकादमीच्यो गुरू प्रियांका राणे हिचे कडेन भारतनाट्यम नाचाचें प्रशिक्षण घेतलें. गाञधर्व म्हाविद्यालयाच्या अरंगेत्रम् सादरीकरणा पयलीं सगळे तरेच्यो परिक्षा ताणी दिल्यात.
अरंगेत्रम सादरीकरणांत तांणी मध्यंतरा पयलीं पुण्यांजली, अलारीप्, जतीसवरम्, वर्णम् हे प्रकार सादर केले. मध्यंतरा उपरांत रजनी नटनम अदिनार, मिनाक्षी थाये, तिल्लाना आनी मंगलम् हे प्रकार सादर केले. तशेंच तारिनी प्रभू हांणी ‘ऐगिरी नंदिनी’ आनी दुर्वा शेटये हांणी ‘शिवस्तूती’ हे एकेरी प्रकार सादर केले.
अशे तरेन दोनूय नृत्यांगनानी आपली गुरू प्रियांका राणे हांच्या मार्गदर्शना खाला शास्त्रीय नाच सादर करून प्रक्षकांचीं मना जिखलीं.
ह्या सुवाळ्याक मुखेल सोयरे म्हणून भारतीय जनता पार्टीचे अध्यक्ष सदानंद तनावडे, मानाची सोयरी म्हणून नामनेचे अभिनेत्री अमिता नायक सलत्री हाजीर आशिल्लीं. दोनूय मानेस्तांनी आपल्या भाशणांत प्रियांका राणे आनी दोगांय नृत्यांगनांक परबीं भेटयलीं. हे कार्यावळीक खासा आमंत्रीत म्हणून मुंबय हांगची उद्देजिका माला शुक्ला आनी विजय राणे हाजीर आशिल्ले.
तशेंच हे कार्यावळीक वाद्यवृंद हाजीर आशिल्ले. जातूंत मुंबिना बी, डॉ. सोमीय एन., व्यंकटेश्वरन्, शर्मिला राव आनी कुमार कृष्णन हांचो आस्पाव आशिल्लो. संतोष तारी हांणी रंगमाची सजयल्ली.
ह्या वेळार सश्विनी कुमार प्रभू हांणी उपकार मानले. ऐश्वर्या नायर हांणी सुत्रसंचालन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
