भांगरभूंय | प्रतिनिधी
दिवचलः सांखळे नगरपालिका आनी गोंय सरकाराच्या वतीन नितळ सांखळे आनी सोबीत सांखळे संकल्पा खाला पुराय मास्टर प्लॅन तयार केला. ह्या मास्टर प्लॅन खाला साखळेतले रस्ते चार लेनीचे, रुंद आनी सोबीत करतले. अशे तरेन सांखळेची आधुनीक उदरगत दिसतली अशें मुख्यमंत्री डॉ. प्रमोद सावंत हांणी सांगलें.
सांखळे शारांतले वेगवेगळे रस्ते चार लेनीचे करतले. मुख्यमंत्री आनी थळावे आमदार डॉ. प्रमोद सावंत हांणी ह्या कामाचें उक्तावण केलें. ह्या वेळार नगराध्यक्ष सिद्धी प्रभु, उपनगराध्यक्ष आनंद काणेकार, दयानंद बोर्येकार, हेर नगरसेवक, अधिकारी आनी कार्यकर्ते हाजीर आशिल्ले.
सुरवेक सांखळे बस स्टँण्ड सावन शिवाजी पुतळ्या कडल्या रस्त्याचें काम सुरु करतले आनी उपरांत भलायकी केंद्रा सावन होंडा पुला मेरेन चार लेन करतले. हें काम पुराय जावपाक सुमार देड ते दोन वर्सां लागतलीं अशें मुख्यमंत्री सावंत हांणी सांगलें.
साखळे शाराक देशांतलें आदर्श शार करपा खातीर जायत्यो येवजण्यो सुरू आसात. आधुनीक सुविधा, खेळ, कला, भलायकी, शिक्षण हांचे वांगडाच जायते नवे उपक्रम सुरू आसात. साखळेची शिक्षणीक केंद्र म्हूण वळख जाता. जंय जायत्यो शिक्षणीक संस्था आसात. केजी ते पीजी मेरेन शिक्षण वेवस्था आसा. आतां मास्टर प्लाना वरवीं आधुनीक उदरगत जातली अशें मुख्यमंत्र्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
