भांगरभूंय | प्रतिनिधी
कांय मनशांच्या आंगांत हेरांक मजत करपाचो गूण आसता. पूण, केन्ना केन्ना अश्या मजत करपी मनशां मेरेन आमी पावंक शकनात वा एकाद्री मजत करपी व्यक्ती गरजेवंतां कडेन योग्य तरेन पावंक शकना. ते खातीर ह्या मजत करपी मनशांचो एक पंगड तयार करून त्या वरवीं समाजांत अडिल्ल्यांक मजत करप, सहकार्य करप, आपत्कालीन सेवा दिवप हो हेत बाळगून चार- पांच समविचारी व्यक्ती धा वर्सा आदीं सांखळेच्या श्रीपांडुरंग देवळांत एकठांय आयल्यो आनी थंय जल्मलो ‘एव्हीएस ग्रुप सांखळी’. हेरांत मजत करपा खातीर हो पंगड एक माध्यम जाला. एकामेकांक एके सांखळेंत जोडीत गेल्लो हो पंगड आयज धा वर्सां पूर्ण करता. प्राचार्य अनिल वेर्णेकार हांणी ‘ईव्हीएस’ हें नांव सुचयलें आनी सगल्यांनी ताका सहमती दाखयली. शिवानंद खेडेकरकाकांच्या पिशोलांतल्यान एक सुंदर बोधचिन्न तयार जालें.
खंयचोय पंगड तयार जालो की ताका आसता समिती. पूण, ह्या पंगडाक समितीय ना. वांगड्यांक कसलेंच शुल्क ना. समिती नासतनाय हो पंगड अजून सुरळीत चलता. ह्या पंगडांत आसात भटजी, म्हालो, दोतोर, वकील, सर्पमित्र, शिक्षक, परिचारिका आनी हेर कितलेशेच समाजीक कार्यकर्ते आनी ह्या सगल्यां मदीं ह्या पंगडाचे एक मुख्य आश्रयदाते चित्रकार शिवानंद खेडेकारकाका. ईव्हीएस पंगडाची बसका आसूं वा कसलेंय शिबीर आसूं, तांचें सभाघर सदांच ह्या पंगडा खातीर उपलब्ध आसता. आयज ह्या पंगडांत सांखळी वाठारांतल्यो तशेंच केरी, पर्ये, मोर्ले, कुडणें, हरवळें आनी हेर वाठारांतल्यो व्यक्ती आसात. पंगडाचें आनीक एक खाशेलपण म्हणल्यार ह्या पंगडान आपलो एक व्हाॅटसअॅप ग्रुप केला आनी तातूंत फकत गरजेच्या अश्या गटां कडेन संबंदितूच म्हायती घालतात. फालतू अश्या कसल्याच मॅसेजींनी हो ग्रुप भरना.
कोरोना काळांत ह्या पंगडान ऑक्सिमिटर, थर्मामिटर उपलब्ध करून दिले. सध्या ह्या पंगडा कडेन 6 व्हीलचॅर, 7 वॉकर, 2 अॅडजेस्टेबल खाटी, मॅट्रेस (अॅर बॅग) उपलब्ध आसात. हें सगलें ईव्हीएस वांगड्यांनी पुरस्कृत केलां. राजेंद्र पांगम, धनंजय वाळके, दर्शना वाडकार, किरण हंगल, शिवानंद खेडेकार, प्रशांत पिंगे, शिल्पा कामत, आरती म्हाडेश्वर, हेतल लवू गोवेकार आनी अर्चना कामत हांणी गरजेच्यो वस्तू दिवन सहकार्य केलां. ह्या पंगडा भायली कुडणेंची एक व्यक्ती गजानन गुरव हांणी पंगडा खातीर व्हीलचॅर आनी खाट दिल्या. तशेंच पंगडा भायल्या राजेश माणिकराव काणेकार हांणी वॉकर दिला. जांकां कोणाक गरज लागता तांकां तें मुफत दितात.
फाटलीं धा वर्सां ह्या पंगडाची दरेक बसका थारायिल्ल्या दिसा आनी थारायिल्ल्या वेळांतूच सुरू जाता. तांचे हे शिस्तीक लागून वांगडीय वेळा आदींच बसकेक हाजीर रावतात. चुकून कांय कारणा खातीर कोणूय उसरां पावलो जाल्यार तो बसकेंत सामील जाता. एकूय व्यक्ती पंगड सोडिना.
पंगडान केएलई हॉस्पिटलाचे वतीन हार्ट स्पेशालिटी कॅम्प, होमिओपॅथी शिबीर, अवयवदान शिबीर, नेत्रदान शिबीर, फूड बँक शिबीर, गॅस सिलिंडर सुरक्षा अशे कॅम्प आयोजीत केल्ले.
इव्हीएस पंगडा भायले लोकूय मजत करतात. आतां मेरेन तांणी अपघात, निमणे संस्कार, सोरोप धरून ताका ताच्या अधिवासांत सोडप, जखमी जाल्ल्या पक्ष्याक सुरक्षा दिवप, जनावरांचेर उपचार करप अशी वेगळ्यावेगळ्या मळार मजत केल्या. ह्या पंगडाचो कसल्याच पयशांचो हिशेब ना.
एकाद्र्यान कोणाकूय कसलीय मजत केल्यार ती ग्रुपाचेर घालतात. आतां मेरेन ग्रुपांत वट्ट 577 घडणुको नोंद जाल्यात. ते भायर कितल्याश्याच सुवातांतल्या व्यक्तींनी सहकार्य केलां. दरेक वांगडी निसुवार्थी भावनेन सेवा दिता. हो पंगड असोच तिगून उरूं आनी तांचे कडल्यान गरजेवंतांक अशीच सेवा जायत रावूं इतलेंच मागणें.
– राघोबा लवू पेडणेकार
9545663327
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
