भांगरभूंय | प्रतिनिधी
मुख्यमंत्रीः सांखळे नव्यान वेंचून आयिल्ल्या नगरसेवकांक परबीं
भांगरभूंय । प्रतिनिधी
दिवचलः सांखळी नगरपालिकेंत भाजपाच्या इकराय उमेदवारांनी जैत मेळोवन सांखळे इतिहास रचलो. हे गजालीची आपल्याक खूब खोस जाल्या आनी अभिमानूय दिसता. अदीक नव्या नेटान सांखळेचे उदरगतीक चालना दितले, अशे मुख्यमंत्री डॉ. प्रमोद सावंत हांणी सांगलें.
भाजपाच्या इकराय भाजपा पुरस्कृत उमेदवारांनी मुख्यमंत्री डॉ. प्रमोद सावंत हांची भेट घेतली. ह्या वेळार भाजपा प्रदेशाध्यक्ष सदानंद तानावडे, दामू नायक, नरेंद्र सावयकार, मंडळ अध्यक्ष गोपाळ सुर्लकार, सरचिटणीस कालीदास गांवस, राया पार्सेकार, संजय नायक, राजन फाळकार हाजीर आशिल्ले.
मुख्यमंत्री डॉ. सावंत हे प्रचारा खातीर कर्नाटकांत गेल्ले. ताका लागून नव्यान वेंचून आयिल्ल्या नगरसेवकांक तांणी 10 मेक भेट दिली आनी तांकां परबीं भेटयली.
पक्षाचे निश्ठावंत कार्यकर्ते, मतदार आनी सगळ्या घटकांच्या एकवटीत यत्नांक लागून हें जैत मेळ्ळां. केंद्र आनी राज्य सरकाराच्यो येवजण्यो घराघरांनी पावतात, ताका लागून लोकांनी भाजपाक तेंको दिलो. ह्या जैताक लागून सांखळे ट्रिपल इंजीन सरकार आयलां. सांखळेक आनीक आधुनीक करचे खातीर संघटीत वावर करचो, असो मुख्यमंत्री डॉ. सावंत हांणी उलो मारलो. ह्या वेळार सदानंद तानावडे आनी पक्ष कार्यकर्त्यांकूय डॉ. सावंत हांणी परबीं दिली. सदानंद तानावडे हांचें मार्गदर्शन आनी सगळ्यांचो आदार, मुख्यमंत्र्यांची वाडत वचपी लोकप्रियता हाका लागून व्हड जैत मेळोवप शक्य जालें, अशें गोपाळ सुर्लकार आनी कालीदास गांवस हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
