भांगरभूंय | प्रतिनिधी
सांखळी : घटकराज्य दिसा निमतान शुक्रारा 30 मेक सांखळेच्या रवींद्र भवनांत ‘बुयांव लायव्ह इन कॉन्सर्ट’ ही संगिताची कार्यावळ आयोजीत केल्या. हे कार्यावळींत गोंय शाहीर म्हूण लोकप्रीय आशिल्ले उल्हास बुयांव हांच्या काळांतल्या रचनांचें सादरीकरण जातलें, अशी म्हायती रवींद्र भवनाचे उपाध्यक्ष दत्ताराम चिमुलकार हांणी पत्रकार परिशदेंत दिली. तांचे वांगडा संचालक दिनकर घाडी आनी श्रीरंग सावळ हाजीर आसले.
केंद्रशासीत आशिल्ल्या गोंयाक 30 मे 1987 ह्या दिसा घटकराज्याचो दर्जो मेळ्ळो. गोंयची अस्मिताय, कोंकणी भाशेचो अभिमान आनी लोकशाय मुल्यांचेर आदारीत ही वाटचाल गोंय शाहीर उल्हास बुयांव हांच्या सर्जनशील संगितान लोकां मदीं जागृती घडयली. जनमत कौलाचो काळ आसूं वा कोंकणी भाशा आंदोलन तांच्या गितांनी गोंयकारांक दिशा आनी उमेद दिली. हे कार्यावळीच्या माध्यमांतल्यान तांच्या संगिताच्या वावराचो गोंयच्या सांस्कृतीक इतिहासाचो भोवमान करतले. नवे पिळगेक त्या संघर्शाची वळख करून दिवन सगळ्या संगीतमोगींक क भावस्पर्शी संगीतमय अणभव दिवपाचो हेतू आसा, अशें चिमुलकार हांणी सांगलें.
‘बुयांव लायव्ह इन कॉन्सर्ट’ कार्यावळ बुयांव थिएटर्सा वतीन सादर करतले. हे कार्यावळींत गोंय युवासृजन पुरस्कार फावो जाल्ले गोंयचे नामनेचे संगीतकार आनी गायक सिद्धनाथ बुयांव हांचे वांगडा गायिका सिम्मी रुद्रेश फोंडेंकार, नामनेचे कॉमेडियन प्रिन्स जाकोब, सुदेश नागवेंकार, निवेदक प्रा. अनंत अग्नी वांटो घेतले.
हे कार्यावळींत उल्हास बुयांव हांच्या वेंचीक गितांचें तशेंच तांचे पूत सिद्धनाथ आपल्या स्वताच्या रचनांचें सादरीकरण करतले. हे कार्यावळींत ऋत्वीक बुयांव (ड्रम्स) हांचें संगीत संयोजन आसतलें. यतीन तळावलीकार (तबलें आनी तालवाद्यां), प्रद्युमन प्रभुदेसाय (गिटार), वेध बोरकार (गिटार), लिनॉय फर्नांडीस (बास गिटार), निहाल काणे (की बोर्ड) आनी निलेश प्रभुदेसाय हे कलाकार साथसंगत करतले. ही कार्यावळ सगळ्यां खातीर उक्ती आसतली, अशें चिमुलकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
