भांगरभूंय | प्रतिनिधी
मुख्यमंत्री डॉ. प्रमोद सावंतः पयलेच बसकेंत हाजेरी लावन घेतलो शाराच्या नियोजनाचो नियाळ
भांगरभूंय । प्रतिनिधी
दिवचलः सांखळी पालिके वतीन विवीध येवजण्यांक चालना दितना स्वयंपूर्ण पालिका करपा खातीर सरकारा वतीन 20 कोटी रुपयांचो निधी मंजूर करतले, अशें आस्वासन मुख्यमंत्री डॉ. प्रमोद सावंत हांणी दिलें.
सांखळी पालिकेंत भाजपाची सत्ता आयल्या. पयलेच बसकेंत अपेक्षे प्रमाण मुख्यमंत्री डॉ. सावंत हांणी हाजीर रावून शाराच्या नियोजनाचो नियाळ घेतलो.
तांणी सगळ्या वांगड्यांनी पालिका स्वयंपूर्ण आत्मनिर्भर करचे खातीर वेगवेगळे प्रकल्प चालीक लायात, जें पोरणें प्रलंबीत विशय आसात ते सोडयात, नव्या येवजण्यांचो आराखडो तयार करून नितळ, सुंदर, आदर्श आनी गोंयांतलें रोल मॉडेल शार म्हूण विकसीत करचे खातीर प्रामाणीक यत्न करात, अश्यो सुचोवण्यो मुख्यमंत्री डॉ. सावंत हांणी केल्यो.
सांखळेच्या 16 दुकांनांच्या भाड्याचो प्रस्न पयलेच बसकेंक आयलो. ताचेर निर्णय घेतना दोन वर्सां आदलेंच भाडें दिवपाक ह्या वेळार मंजुरी दिल्ल्याचें नगराध्यक्ष रश्मी देसाय हांणी सांगलें.
ह्या वेळार मास्टार प्लान, मेकळे सुवातेंत अर्थीक उत्पन्न दिवपी प्रकल्प, बाजार संकुल, उदका स्त्रोत खात्याच्या तांब्यांतलीं आठ दुकानां आपले सुवादीन घेवप, बाजार तशेंच सगल्या प्रभागांनी सर्व्हेक्षण करून लोकांक अपेक्षीत येवजण्यो आंखप, सांखळेचे येरादारी समस्येचेर उपाय काडपा खातीर पर्यायी मार्ग तयार करप आनी ते खातीर जमीन संपंदीत करप तशेंच हेर विशयांचेर चर्चा जाली. अमृत येवजणे खाला सुसज्ज प्रकल्प हातांत घेवप, खेळां मैदानाची देखरेख खेळां प्राधिकरणा कडेन दिवप, बरी पार्कींग सुविधा, घाणयाऱ्या उदकाचेर प्रक्रिया करपी प्रकल्प पुराय करप, प्रलंबीत दुकानांचो प्रस्न निकालांत काडप, बाजार आनी हेर वाठारांनी सुविधा निर्माण करप, ह्या विशयांचेरूय चर्चा जाली, अशी म्हायती रश्मी देसाय हांणी दिली.
ह्या वेळार उपनगराध्यक्ष आनंद काणेकार, दयानंद बोर्येकार, रिजाय खान, प्रवीण ब्बेगन, ब्रह्मा देसाय, सिद्धी पोरोब, यशवंत माडकार हांचे सयत सगळ्याच नगरसेवकांनी विवीध सुचोवण्यो केल्यो. तशेंच नियोजीत येवजण्यो बसकेंत मांडल्यो.
पावसाळ्यांत जतनाय घेवप, घाणयारें उदक गटारांनी आनी हेर कडेन सोडटात तांचेर कारवाय करप, कोयर वेवस्थापन, हुंवार आयल्यार उपाय येवजण करप, भौशीक भलायकेचे बाबतींत तशेंच धामीचीं दुयेंसां पातळचीं न्हय हे खातीर जागरुकता करप हाचेरूय बसकेंत चर्चा जाली.
मुख्यमंत्री डॉ. सावंत हे आमदार ह्या नात्यान पालिका मंडळाचे स्विकृत नगरसेवकूय आसात. तांणी पयलेच बसकेक वेळ काडून हाडेरी लायली आनी खूबशा प्रकल्पांक मंजुरी दिवपाची हमी दिली. ते खातीर पालिका मंडळान तांकां परबीं दिली. मुख्याधिकारी कबीर शिरगांवकार आनी हेर अधिकारी ह्या वेळार हाजीर आशिल्ले. नगराध्यक्ष रश्मी देसाय हांणी मुख्यमंत्र्यांक येवकार दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
