सांकवाळ- झुआरीनगरच्या मावंट लिटेरा झी स्कुलांत बॉंब दवरिल्ल्याचो ई-मेल
भांगरभूंय | प्रतिनिधी
वास्को: सांकवाळ-झुआरीनगरच्या मावंट लिटेरा झी स्कुलांत बुधवारा, २५ तारखेर आयिल्ल्या बॉंब दवरिल्ल्याच्या ई-मेलीक लागून बरोच बोवाळ जालो. तशेंच तपासा उपरांत ही एक फकत वावडी आशिल्ल्याचें स्पश्ट जाल्ल्यान सगल्यांनी समाधान उक्तायलें. ह्या प्रकरणांत संबंदीत ई-मेल धाडटल्या अनवळख्याचो पुलीस सोद घेतात.
स्कुलांत शेकड्यांनी विद्यार्थी शिकतात. मुख्याध्यापिकेके बुधवारा सकाळीं सुमार ९.१५ वरांचेर एक ई मेल मेळ्ळो. तातूंत शाळेच्या वाठारांत बॉंब दवरिल्ल्याचो संदेश आशिल्लो. ह्या बॉंबाचो स्फोट जावचे पयलींच सगली शाळा रिकामी करपाची सुचवणी दिली. हो ई-मेल मेळटांच मुख्याध्यापिकेन हे विशीं रोखडीच पुलिसांक म्हायती दिली. हाका लागून पुलीस, सुण्यां पंगड, बॉंब निकामी करपी पंगड, एटीएस कमांडो, उजो पालोवपी पंगड थंय पावलो. विद्यार्थ्यांक वर्गांतल्यान भायर काडून रोखडेंच मैदानांत व्हेलीं. तांणी भियेवचें न्हय म्हणून मायका वेल्यान तांकां धीर दिताले. सगल्या वर्गांतल्या विद्यार्थ्यांच्यो बॅगो मैदानाच्या एका कोणशाक व्हरून तांची तपासणी केली. सगल्या वर्गाची, कार्यालय, तशेंच हेर सुवातांची तपासणी केली. तरी कांयच मेळूंक ना.
ह्या बॉंबा विशीं खबर पातळटांच कांय पालकांनी शाळे मुखार येवन गर्दी केली. तशेंच ही एक वावडी आशिल्ल्याचें समजतांच तांणी समाधान उक्तायलें. सगली तपासणी जाले उपरांत विद्यार्थ्यांक घरा धाडलीं. वास्कोचे उपविभागीय पुलीस अधिकारी गुरुदास कदम हे थंय हजर रावले. तांणी सगले परिस्थितीचो आढावो घेतलो. ‘बॉंब दवरला, ही एक वावडी’ अशें तपासणे वेळार स्पश्ट जाल्ल्याचें तांणी सांगलें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
