भांगरभूंय | प्रतिनिधी
-उपविभागीय दंडाधिकाऱ्यां कडल्यान आदेश जारी
पणजी : सांकवाळ कोमुनिदादीच्या सर्वे क्र. 154/1 आनी 90/1 हे जमनींत अतिक्रमण करून 62 बांदकामां उबारल्यात. हे विशींचो सर्वे क्र. 154/1 जमनींतल्या 31 बांदकामां आड आयज 29 नोव्हेंबराक सकाळीं 9.30 वरांचेर कारवाय करतले. हे विशींचो आदेश उपविभागीय दंडाधिकारी तशेंच अतिक्रमण हटाव पंगडाचे प्रभारी उदय प्रभुदेसाय हांणी जारी केला.
ह्या प्रकरणांत सांकवाळ कोमुनिदादीचे अॅटर्नी जयेश फडते हांणी मुंबय उच्च न्यायालयाच्या गोंय खंडपिठांत याचिका दाखल केल्या. सांकवाळ पंचायत क्षेत्रांत कोमुनिदादींत सर्वे क्रमांक 154/1 त 22,850 चौखण मिटर आनी सर्वे क्रमांक 90/1 त 14,175 चौखण मि. जमीन आशिल्ल्याची म्हायती याचिकेंत नमूद केल्या.
हे विशीं सांकवाळ कोमुनिदादीन पयलीं 10 फेब्रुवारी 2022 त दक्षीण गोंय जिल्होधिकारी आनी दक्षीण गोंय कोमुनिदाद प्रशासक हांचे कडेन कागाळ दाखल करून कारवायेची मागणी केल्ली. 24 फेब्रुवारी 2022 दिसा वेर्णे पुलिशेंतूय हे विशीं कागाळ केल्ली. ते उपरांत सांकवाळ कोमुनिदादीन संबंदींत यंत्रणे कडेन कारवायेची सातत्यान मागणी केल्ली. पूण कारवाय करपाक कोणूच फुडें येवंक ना. दुसरे वटेन बांदकामां उबारपाचें काम चालूच उरलें.
संबंदींत यंत्रणा कारवाय करिनाशिल्ल्यान फडते हांणी खंडपिठांत धांव घेतली. याचिकेंत तांणी राज्य सरकार, मुरगांव नियोजन विकास प्राधिकरण, दक्षीण गोंय जिल्होधिकारी, दक्षीण गोंय कोमुनिदाद प्रशासक, सांकवाळ पंचायत, पंचायत उपसंचालक, संतोष मुरारी नायक, राजेश मुरारी नायक आनी रत्नाकर प्रभू हांकां प्रतिवादी केले. तांणी 31 बेकायदो बांदकामां उबारिल्ल्याची म्हायती खंडपिठाक दिल्या.
खंडपिठान पंचायत उपसंचालक आनी मुरगांव नियोजन विकास प्राधिकरणाच्या (एमपीडीए) वांगडी सचिवांक दोनूय जमनींतलीं बांदकामांची पळोवणी करून अहवाल सादर करपाचे, तशेंच कारवाय करपाचे निर्देश दिले. संबंदितांनी पळोवणी केली तेन्ना अतिक्रमणां करून बांदकामां उबारिल्ल्याचे उक्तें जालें. दक्षीण गोंय कोमुनिदाद प्रशासकान 20 ऑक्टोबर 2023 दिसा बांदकामांचेर कारवाय करपा खातीर पंगडाची मागणी केली. बुधवार 29 नोव्हेंबराक ह्या अतिक्रमणांचेर कारवाय करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
