भांगरभूंय | प्रतिनिधी
पणजी : गोंयांत नेण्ट्या चलयांचेर अत्याचार जावपाच्या प्रकरणांनी वाड जायत आसा. सांकवाळे अशीच एक घडणूक घडल्या. एके १५ वर्सां पिरायेचे चलयेचेर फाटल्या दोन वर्सां सावन सेगीत लैंगीक अत्याचार करपी २३ वर्सां पिरायेच्या तरणाट्या आड वेर्णा पुलिसांनी मंगळारा गुन्यांव दाखल केला. ह्या प्रकरणांतल्या दुबावीताचें नांव अरुण चव्हाण (रा. बायणा- वास्को) अशें आसा. पुलिसांनी ताचेर भारतीय न्याय संहिता आनी ’पोक्सो’ सारकिल्ल्या गंभीर कलमां खाला कारवाय सुरू केल्या.
पिडेस्त चलयेचे आवयन वेर्णा पुलीस स्टेशनांत कागाळ नोंद केल्या. हे विशीं पुलिसांक मेळिल्ले म्हायती प्रमाण, एप्रील २०२४ ते ३० मार्च २०२६ ह्या दोन वर्सांच्या काळांत दुबावीत अरुण चव्हाण हांणी पिडेस्ताचो सेगीत विनयभंग केलो आनी तिचे वांगडा बळयां शरिरीक संबंद दवरले. ही घडणूक सांकवाळे पिडेस्ताच्या घरा आनी वेळसांव दर्यादेगेर घडिल्ल्याचें पुलीस तपासांत समजलें.
वेर्णा पुलिसांनी ह्या प्रकरणांत गुन्यांव नोंद केला. प्रकरणाची खरसाण लक्षांत घेवन बायलां उपनिरीक्षक प्रमिला फर्नांडीस ह्या प्रकरणाचो खोलायेन तपास करतात. तांकां पुलीस निरीक्षक आनंद शिरोडकार हांचें मार्गदर्शन आनी मुरगांवचे पुलीस उपअधीक्षक गुरुदास कदम हांचें विशेश सहकार्य मेळटा.
नेण्ट्या चलयांचेर वाडपी अत्याचारांक लागून सांकवाळे आनी वास्को वाठारांत चिंतेचें वातावरण पातळ्ळां. दुबावितान पिडेस्ताचेर चेंपण हाडून वा तिका धमकावन हो प्रकार चलू दवरिल्लो काय ना? हाचोय सोद पुलीस घेतात. सध्या दुबाविताक ताब्यांत घेवपाची प्रक्रिया सुरू आशिल्ल्यान पिडेस्त चलयेची वैजकी तपासणी आनी जबाब नोंद करपाचें काम पुराय जालां. गोंयच्या भुरग्यांचे सुरक्षिततायेचो प्रस्न ह्या निमतान परत एक फावट मुखार आयला. दोशींक खर ख्यास्त जावची अशी मागणी थळाव्यां कडल्यान जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
