सांकवाळचो मेगा प्रकल्पाक भायर मारात

भांगरभूंय | प्रतिनिधी

सांकवाळकारांक वायनाड भशेन परिस्थिती उप्रासपाचो भंय

भांगरभूंय । प्रतिनिधी

वास्कोः सावळफोंड- सांकवाळे जावपी मेगा हावसींग प्रकल्पाक लागून गांवांत समस्या निर्माण जातल्यो. पर्यावरणाचेर व्हड परिणाम जातलो. तशेंच दोंगर कापून मदींच बांदतात त्या ह्या प्रकल्पाक लागून वायनाड भशेन परिस्थिती निर्माण जावपाचो भंय आसा. ताका लागून ह्या प्रकल्पाक हांगाच्यान भायर मारपाक मुखार सरात असो उलो आमदार, सांकवाळेचे कांय पंच, एनजीओ कार्यकर्ते तशेंच थळाव्या लोकांनी आयतारा घेतिल्ले बसकेंत उलो मारलो.

आपूण सामान्य नागरिकां वांगडा आसा. हो प्रकल्प सांकवाळे गांवांत नाकाच. कुठ्ठाळी मतदारसंघांत येवपी मेगा हावसींग प्रकल्पाक आपलो विरोध आसा, अशें कुठ्ठाळीचे आमदार आंतोनियो वास हांणी सांगलें.

गोंयां भायली रिअर इस्टेट लॉबी गोंयच्या पर्यावरणाचो विध्वंस करता. जमनींचें रुपांतर फटाफट जाता. ताका लागून गोंयकार, तांचीं भुरगीं हांचो फुडार कितें, असो प्रस्न विरोधी पक्ष फुडारी युरी आलेमांव हांणी उपस्थीत केलो.

सावळफोंड दोंगरार सुमार 35 हजार चौखण मिटर जमनीर 650 फ्लॅट आनी 70 व्हिला तशेंच दरेका फ्लॅटांनी स्विमिंग पूल, पांच व्हड स्विमिंग पूल असो मेगा हावसींग प्रकल्प उबारपाचे आसात. ताका 2007 सावन विरोध जाता. तो आदीं मर्यादीत स्वरुपाचो आशिल्लो. मात तातूंत बदल जावन आनी मालकी हक्क दुसर्‍या कडेन वचून आतां तो मेगा प्रकल्प जाला. सांकवाळ पंचायतीन मार्च 2024 त ताका परवानगी दिल्ली. ह्या वेळार पंच तुळशीदास नायक हांचे सयत चार पंचांनी विरोध केल्लो. पूण कांय पंचांनी तांचे कडेन आडनदर करून रातयां भितर बांदकामाक परवानगी दिली. ह्या प्रकल्पाक आतां गांवांतल्या विरोध जाता.

ह्या प्रकल्पाक विरोध करपाक बसके वेळार विरोधी पक्ष फुडारी युरी आलेमांव, केपेंचे आमदार एल्स्टन डिकॉस्टा, कुठ्ठाळीचे आमदार आंतोनियो वास, आदली मंत्री एलिना साल्ढाणा, पंच तुळशीदास नायक, समाज वावुरपी प्रजल सांखरदांडे, रामा काणकोणकार, शंकर पोळजी, तारा केरकार, ओलंसियो सिमोयस, पिटर डिसोजा, नारायण नायक आनी हेर कार्यकर्ते हाजीर आशिल्ले. ह्या मेगा प्रकल्पा आड लढो दिवपा खातीर एकठांय येयात. कांय जाण तुमचे मदीं फूट घालपाचो यत्न करतले तेन्ना सादूर रावात असो उलो ह्या वेळार सगल्यांनी मारलो.