भांगरभूंय | प्रतिनिधी
पणजीः भ्रश्टाचार विरोधी विभागाच्या (एसीबी) चवकशी अहवाला उपरांत पंचायत संचालकान सांकवाळचो सचीव म्हणून काम करपी ग्रामसेवक ऑर्विले सी. वालीस हाका निलंबीत केलो.
सचीव म्हणून काम करतना ऑर्विले वालीस हांणी पंचायतीचे बसकेचो थाराव स्वताच्या मर्जीप्रमाण बदल्लो. ताची वागणूक केंद्रीय नागरी सेवा नेम, 1964 च्या नियम 3 चें उल्लंघन करता अशें एसीबीन म्हणलें. अतिरिक्त दक्षता संचालकांनी धाडिल्ल्या चवकशी अहवाला उपरांत पंचायत संचालकान निलंबीत करपाचो आदेश जारी केलो.
निलंबीत काळांत तांकां मुरगांव गट उदरगत अधिकाऱ्यांच्या कार्यालयांत हाजीर रावचें पडटलें. वरिश्ठां कडल्यान परवानगी घेतले बगर तांकां कार्यालयीन वेळार मुरगांव गट उदरगत कार्यालयांतल्यान भायर सरूंक मेळचें ना अशें ह्या आदेशांत स्पश्ट केलां. ऑर्विले वालीस वेगवेगळ्या परवान्या खातीर सतावणूक करता अशी कागाळ वास्कोच्या आनंद भोस हांणी मे 2024त भ्रश्टाचार विरोधी पुलीस विभागाच्या अधीक्षका कडेन केल्ली. तेच प्रमाण शामल लाडू गावस हांच्या बांदकाम परवान्या खातीर केल्लो अर्ज 30 दिसां भितर निकालांत काडपाक अपेस आयिल्लें. पंचायत राज कायद्या प्रमाण अर्ज 30 दिसां भितर निकालांत काडप गरजेचें आसा.
वांगड्यांक कळयनासतना 20 मार्च 2025 दिसा जाल्ले पंचायतीचे बसकेंत तांणी थाराव बदल्लो. तशेंच सरपंच रोहिणी तोरस्कार हाजीर आसतना लेगीत तांणी उपसरपंच डेरीक वेल्स हांची बसकेच्या थारावांचेर सय घेतिल्ली . ह्या सगल्या कागाळींची आनी घडणुकांची चवकशी दक्षता खात्याच्या भ्रश्टाचार विरोधी विभागान (एसीबी) करून अहवाल पंचायत संचालकाक सादर केल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
