भांगरभूंय | प्रतिनिधी
भांगरभूंय । प्रतिनिधी
पणजीः सांकवाळ पंचायतीचे आदले सरपंच रमाकांत बोरकार हांणी आपल्या समर्थकां वांगडा बुधवारा भारतीय जतना पक्षांत (भाजप) प्रवेश केलो. बोरकार पक्षांत आयिल्ल्यान दक्षीण गोंयांत भाजपाक बळकटी मेळटली अशें प्रदेश भाजपा अध्यक्ष आनी राज्यसभा खासदार सदानंद शेट तानावडे हांणी तांकां पक्षांय येवकार दितना सांगलें. रमाकांत बोरकार हांच्या वांगडा तांची घरकान्न डॉ सुनिता बोरकार, आदली उपसरपंच आशा नायक आनी तांच्या समर्थकांनी भाजपात प्रवेश केलो. तांच्या भाजपा प्रवेशा वेळार आदले खासदार विनय तेंडुलकर, कुठ्ठाळी मतदारसंघाचे प्रभारी चंद्रकांत गावस, सरचिटणीस अच्युत नायक आनी उदय गांवकर हजीर आशिल्ले.
बोरकार हे स फावट सांकवाळचे सरपंच आनी पंच आशिल्ले. गोंय ओबोसी केंद्रीय समितीचे ते वांगडी आसात. 2017 चे वेचणुके सावन आमी बोरकांर हांका भाजपात हाडपाचे यत्न आमी चलयल्ले मात तेन्ना जो योग जुळून येवपाक शकलो ना तो आतां जुळून आयला. बोरकार हांका लागून दक्षीण गोंयांत चड करून दाबोळी आनी कुठ्ठाळी मतदारसंघात पक्षाक बरो फायदो जातलो. पक्षाची दक्षीण गोंयची उमेदवार पल्लवी धेंपो हांच्या जैता खातीर बोरकार आनी तांचे समर्थक वावुरतले अशी आस्त तानावडे हांणी उक्तायली. बोरकार हांची घरकान्न डॉ सुनिता बोरकार .फोंड्यातल्या पीईएस म्हाविद्यालयांत प्राध्यापक म्हणून काम करता. तांच्या सारके सुशिक्षीत लोक पक्षांत येतात तें पळोवन खोस भोगता अशें तानावडे हांणी सांगलें.
लोकसभा वेचणुकेंत साकवाळ पंचायत वाठार आनी कुठ्ठाळी मतदारसंघातल्यान पल्लवी धेंपो हांका चडांत चड मता दिवंन जैतिवंत करपाचो सोपूत घेवया अशे रमाकांत बोरकार हांणी सांगलें. मुरगांव तालुक्यांतल्या वास्को, मुरगांव, दाबोळी आनी कुठ्ठाळी मतदारसंघातले जे मतदार सध्या भाजपा वांगडा नात तांकां भाजपाच्या उमेदवाराक कित्याक जैतिवंत करपाक जाय हें पटोवन दिवन आमच्या वांगडा हाडपाचें काम आमी करतले अशेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
