सह्याद्रींत पयलेच खेपे : आंबोली ते मांगेली वाठारांत आठ वाग

भांगरभूंय | प्रतिनिधी

सावंतवाडी, खबरां संस्था ः आंबोली (ता. सावंतवाडी) ते मांगेली (ता. दोडामार्ग) मेरेनच्या सह्याद्री पट्टेंत दुर्मीळ जायत वचपी आठ वागांचें अस्तित्व रान खात्याच्या सर्वेक्षणांतल्यान दिसून आयलां. देखून ह्या सह्याद्री पट्ट्यांत मुंबय उच्च न्यायालयांत वाग कॉरिडोर जावपा खातीर दाखल केल्ली याचिका घटमूट जाल्या. हे संबंदीं वन शक्ती संस्थेची न्यायालयांत याचिका सुरु आसा. जानेवारी ते मे 2024 मेरेन रान खात्यान लायिल्ल्या कॅमेऱ्यांनी हे वाग कैद जाल्यात.
आठ पट्टेरी वागां मदीं पांच मादी आनी तीन नर वागांचो आस्पाव आसा. ‘वनशक्ती’ हे संस्थेन आंबोली ते मांगेली हो वाग कॉरिडॉर संरक्षित जावचो म्हूण उच्च न्यायालयांत याचिका दाखल केल्ली. ह्या वागांची नोंद ह्याच कॉरिडोरांत जाल्या.
कर्नाटकांतल्या सह्याद्री वाग प्रकल्प आनी काली वाग प्रकल्प ह्या दोनूय वाठारांनी जानेवारी ते मे ह्या काळांत रान खातें, सह्याद्री रिझर्व्ह फॉरेस्ट आनी वायल्ड लायफ कन्झर्वेशन ट्रस्टा वरवीं हें सर्वेक्षण केलां. हातूंत सिंधुदुर्गांत आठ वागांची उपस्थिती वेगवेगळ्या कॅमेऱ्यांनी दिसून आयली. सावंतवाडी तालुक्याच्या आंबोली पट्ट्यांत, जाल्यार दोडामार्ग तालुक्याच्या कांय वाठारांनी हे वाग मेळ्ळे. खाजगी संस्थांनी लायिल्ल्या कॅमेरांनी ह्या वागांचें अस्तित्व उक्तें जालें. पूण रान खातें तें न्हयकारतालें. दोन वर्सां आदीं आंबोली वाठारांत वाग गायींक खातानाचे एक चित्र कॅमेरात दिशिल्लें. ह्या वेळार रान खात्यान वागाचें अस्तित्व मान्य केल्लें.
सावंतवाडींत जाल्ले पत्रकार परिशदेंत सिंधुदुर्गांत 50 वाग आसात अशें वनशक्ति फावंडेशनाचे स्टॅलिन दयानंद हांणी सांगिल्लें. एके संस्थेन केल्ल्या सर्वेक्षणाची म्हायती दितना तांणी ही गजाल स्पश्ट केल्ली.
हे फाटभुंयेर स्टॅलिन दयानंद हांणी केल्ल्या दाव्याची खात्री जाल्या कारण रान खात्यान केल्ल्या सर्वेक्षणांत आठ पट्टेरी वाग मेळ्ळ्यां. आंबोली ते तिलारी वाठारांत वागांची हालचाल आनी अस्तित्व लक्षांत दवरून सुरक्षे खातीर चड खर पावलां उबारतले. रातची गस्त आनी कॅमेरा ट्रॅप, तशेंच ड्रोन आनी हेर कार्यावळी वरवीं रातच्या शिकार करप्यांचेर देखरेख दवरतलें. सुरक्षेचे नदरेन वेगवेगळे उपक्रम हातांत घेतले अशी म्हायती सिंधुदुर्गाचे उपरान संरक्षक एस. नवकिशोर रेड्डी हांणी दिली.