भांगरभूंय | प्रतिनिधी
मुंबय, खबरां संस्था : सहारा इंडिया गटाचे मुखेली सुब्रतो रॉय (75) हांकां मंगळारा रातीं उसरां मुंबयच्या कोकिलाबेन हॉस्पिटलांत मरण आयले. ते फाटले जायते दीस दुयेंत आशिल्ले. सुब्रत रॉय हे देशांतले मुखेल उद्देगपती आनी सहारा इंडियाचे संस्थापक. देशभर तांकां ‘सहाराश्री’ ह्या नांवानूय वळखताले.
गोरखपूरच्या सरकारी तंत्रीक संस्थेंतल्यान तांणी अभियांत्रिकी शिक्षण घेतलें. 1976 वर्सा गोरखपूर सावन तांणी आपलो वेवसाय सुरू केलो. 1992 वर्सा सहारा पंगडान ‘राष्ट्रीय सहारा’ नांवाचें दिसाळें सुरू केलें. हाचे भायर कंपनीन ‘सहारा टीव्ही’ नांवाचें स्वताचें टीव्ही चॅनलय सुरू केल्लें. कंपनी मिडिया, रियल इस्टेट, फायनान्स ह्या सारक्या जायत्या मळांचेर काम करता.
सुब्रतो रॉय जामीनाचेर भायर आशिल्ले
जायतीं वर्सां लोकांचे पयशे दिवंक नाशिल्ल्यान सहारा इंडिया आड पाटणा उच्च न्यायालयांत खटलो सुरु आसा. हे पयशे लोकांनी कंपनीच्या जायत्या येवजण्यांनी गुंतयले. पूण, उपरांत कंपनीक ह्या प्रकरणांत सर्वोच्च न्यायालयांतल्यान व्हडली सुटका मेळ्ळी. फाटल्या वर्सा सर्वोच्च न्यायालयान पाटणा उच्च न्यायालयाच्या अटक आदेशाचेर रोखडीच सुनावणी घेवन ताका स्थगिती दिल्ली. तशेंच फुडले कारवाय करपा संबंदी सद्याची स्थिती तिगोवन दवरपाचो आदेश दिलो. सुब्रतो रॉय हांचे आड आनीक एक खटलो सर्वोच्च न्यायालयांत प्रलंबीत आसा. सध्या ते जामीनाचेर भायर आशिल्ले. गुंतवणूकदारांचे सगले पयशे परत करपा विशीं सहारा इंडिया कंपनीन ही पुराय रक्कम सेबी कडेन दवरल्या, असो दावो केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
