भांगरभूंय | प्रतिनिधी
फोंडें, प्रतिनिधी: बाणस्तारी बुधवारा दनपरां ड्युटीचेर आशिल्ले सहाय्यक उपनिरीक्षक विवेक फडते हांकां मारपेट केल्ल्या प्रकरणांत म्हाड्डोळ पुलिसांनी रजत आडपयकार, बापूय रजनीकांत आडपयकार, आवय शीतल आडपयकार आनी चुलत भाव सोनल आडपयकार हांचे आड रातीं उसरां गुन्यांव नोंद केलो. म्हाड्डोळ पुलिसांनी गुन्याञवांत वापरिल्ली रजताची बुलेट जप्त केल्या.
मेळिल्ले म्हायती प्रमाण, बुधवारा दनपरां पोरणें गोंयच्यान फोंड्यां जीए – ०७- एडी -३८४१ क्रमांकाची बुलेट घेवन रजत हो फोंड्यां वतालो. हॅल्मेट घालूंक नाशिल्ल्यान आनी बुलेटीक दोनूय वटेन हारशे नाशिल्ल्यान थंय तैनात आशिल्ल्या येरादारी पुलिसांनी बुलेट आडायली. तेन्ना तो आनी सहायक उपनिरीक्षक विवेक आडपयकार हांचे मदीं वाद जालो. उपरांत, बुलेट चालकान सहायक उपनिरीक्षकाक मारपाक सुरवात केली. तेन्ना फाटल्यांच्यान गाडी घेवन येवपी रजत आडपयकार हाचे आवय- बापायन सहायक उपनिरीक्षकाक मारपाक सुरवात केली. जखमी जाल्ल्या विवेक फडते हाचेर जीएमसींत उपचार केले.
बुधवारा रातीं उसरां म्हाड्डोळ पुलिसांनी चार जाणां आड गुन्यांव नोंद केलो. तशेंच ह्या गुन्यांवांत वापरिल्ली बुलेट पुलिसांनी जप्त केली. गुन्यांव नोंद केल्ल्या चार दुबावितांक म्हाड्डोळ पुलिसांनी नोटीस धाडल्या. निरीक्षक योगेश सावंत हे ह्या प्रकरणा विशीं तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
