भांगरभूंय | प्रतिनिधी
सत्तरी मल्टीपर्पज संस्थेच्या नावेली फांट्याचें जालें उक्तावण
दिवचल: राज्यांतली सहकारी संस्था एकाच पांख्या खाला हाडून सिंगल ॲप पोर्टल लिंका वरवीं गोंय राज्य सहकारी संस्थे कडेन संलग्न करून संस्थांचो वेव्हार पारदर्शक तशेंच रिणांचो परतावो योग्य तरेन जावचे खातीर विशेश लक्ष दितले.
सहकारी संस्थांनी पयसुल्ली नदर दवरून काम करतना आतां फकत अर्थीक वेव्हारांत न्हय जाल्यार कृषी, पर्यटन, येरादारी अश्या सगल्या मळांचेर काम करचें. राज्यांत सहकारी तत्वांचेर टॅक्सी वेवसाय सुरू करून लोकांक सवलतीच्या दरांत येरादारी सेवा उपलब्ध करून दिवपा खातीर फुडाकार घेवचो अशें मुख्यमंत्री डॉ. प्रमोद सावंत हांणी नावेले केलें.
सत्तरी मल्टीपर्पज कॉ. ऑप. सोसायटीच्या नावेलेच्या चोवदाव्या फांट्याचे उक्तावण कार्यवळीक मुख्यमंत्री उलयताले. ह्या वेळार माचयेर संस्थेचे अध्यक्ष वासुदेव परब, अशोक यादव, सर्व संचालक, कृष्णा गांवस, यशवंत गांवस, काशिनाथ म्हाळशेकार, प्रेमनाथ हजारें, म्हाळु गांवस, श्रीपाद सावंत, गोविंद कोरगांवकार, नितीन शिवडेकार, अधिकारी, सहकारी सह निबंधक राजेश परवार, थळावे सरपंच रोहिदास कानसेकार, लक्ष्मण गांवस, रामा नायक, सपना परब, नारायण गांवस, गोपाळ सुर्लीकार, सागर गांवस तशेंच हेर सरपंच, पंचायत वांगडी, अधिकारी हजर आशिल्ले.
गांवची उदरगत जावचे खातीर विवीध आस्थापनां गांवांत येवप गरजेचीं. उदरगतीचे प्रक्रियेंत कोमुनिदाद, गांवांतलीं देवळां, संस्था हांचें सहकार्य म्हत्वाचें. सगल्यांच्या सहकार्यानूच उदरगत जायत रावता. कांय कडेन दुर्दैवान संस्थांनी संचालकांनीच फटींगपणाचे धंदे चलयल्यात. हाका लागून कांय संस्था बुडल्यात, लोकांचो पयसोय बुडला. ह्यान फुडें सहकार मळार पारदर्शकताय निर्माण करतना जायत्यो येवजण्यो राबयल्यात. तांची योग्य तरेन कार्यवाही करपा खातीर सरकार आनीक लक्ष दितले, अशें मुख्यमंत्र्यान मुखार म्हणलें.
व्हिजन दवरून काम करतना सहकारा वरवीं समूह शेतीचो प्रयोग सुरु करपाक लोकांक वांगडा घेवन, विवीध वेवसायांनी योगदान दितले. हाचे वरवीं सहकार माध्यमांत समृद्धी हाडची असोय उलो तांणी मारलो.
अध्यक्ष वासुदेव परब हांणी संस्थेच्या कार्याचीं सविस्तर म्हायती दिली. वेवस्थापकीय संचालक लक्ष्मण गांवस हांणी सुत्रसंचालन केलें. मुख्यमंत्री आनी हेर मानेस्तां हस्तुकीं उक्तावण जालें. तशेंच ह्या वेळार मुख्यमंत्र्या हस्तुकीं मानेस्तांचो भोवमान जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
