सहकार मळाक खत

भांगरभूंय | प्रतिनिधी

राजकी मळाचेर पावल दवरलें काय थोडे सहकारी साकर कारखानो, शेतकरी संघ, सहकारी- शिक्षणीक संस्था काडटात. हाचे फाटल्यान गांवाचो, गांवकारांचो उद्धार आनी मतांची बेगमी हो उद्देश आसतालो. कांय संस्था खूबच फायद्यांत चलतात. मात थोड्यो बुडल्यात. लोकप्रतिनिधी आनी तांच्या समर्थकांनी, संचालक मंडळांनी कायदेशीर अर्थीक वेव्हार करूंक नाशिल्ल्यान त्या संस्थांनी दिवाळें काडलां. मात, ठेविदारांक फोंडांत घालपी जापसालदार व्यक्तींक खर ख्यास्त जाल्ल्याचीं चड उदाहरणां नात. तरीय सहकारी बँको, पतसंस्था स्थापन जायत आसात, तांचे फांटेय सुरू जातात. हालींच तिरुमाला तिरुपती बहुराज्य सहकारी सोसायटीक राज्यांत 13 फांटे उक्ते करपाक कांय वर्सां पयलीं दिल्लो ना हरकत परवानो गोंय सहकार निबंधकान फाटीं घेतला. आॅडीट सादर करूंक नाशिल्ल्यान आनी नेम, अटी पाळूंक नाशिल्ल्यान हो निर्णय घेतला!
कांय आडवाद सोडल्यार सहकारी पतसंस्था, बँकांनी जावपी गैरवेव्हारांचेर नियंत्रण दवरपाक सरकार अयशस्वी थारलां. बँको, पतसंस्थांनी गुंतयिल्लो पयसो खातेदारांक परत मेळूंक ना. म्हापसा अर्बना सारक्या बँकांच्या भोवतेक खातेदारांक मुद्दल मेळ्ळां. कांयच मेळूंक नाशिल्लेय अजून आसपाक शकतात. माशेल महिला, विजनरी, अष्टगंधा अशा बँकांनी मेळून शेकड्यांनी ठेविदारांक लाखांनी रुपयांचें लुकसाण जालां. कांय जाणांनी तर आयुश्यभराचो पयसो ह्या बँकांनी घाल्लो. आंदोलनां, कोर्ट करून जालें, पूण अजून पयशे मेळूंक नात. बापूय करता पाप आनी भुरगीं दितात जाप. संचालक मंडळा वयलो कोण तरी, कोणाच्या तरी सांगण्यान वा स्वताच चुकीचे निर्णय घेता आनी ताचो फटको सहकारी बँकांक बसता. एकलो पाप करता आनी सगल्या संचालकांक मागीर जाप दिवची पडटा. मनस्ताप सोंसचो पडटा. कांय कडेन बुडिल्लो पयसो उबो करपाचो यत्न जाता, पूण मदीं कोणूय न्यायालयांत गेल्यार मागीर हें प्रकरण वर्साचीं वर्सां आडकता.
तिरुमाला तिरुपती सोसायटींत कितल्या गोंयकारांचो पयसो आसा, हें सहकार खात्याक खबर आसुये. पूण आॅडीट अहवाल मेळूंक नाशिल्ल्यान तांणी एनओसी फाटीं घेतल्या. रिझर्व्ह बँकेच्या नेमांक लागून बँक बुडली तरी पयसो सुरक्षीत आसता. तो मेळपाक उशीर लागूं येता. हे सोसायटीचे देशांत 170 फांटे आसात. गोंयांत फांटे उगडपाक 31 जुलय 2014 आनी 28 जून 2018 दिसा सहकार निबंधकान एनओसी दिल्ली. पूण आतां अहवाल दिवंक ना, नोटिशींक प्रतिसाद दिवंक ना, म्हूण एनओसी फाटीं घेतल्या. गुंतवणूक, वेव्हार करतना गोंयकारांनी सादूर रावचें अशी शिटकावणीय निबंधकान दिल्या. कागाळ आसल्यार सरकारी अधिकाऱ्या कडेन संपर्क करचो, अशेंय कळयलां.
सहकारा बगर उद्धार ना, हें महाराष्ट्र सहकार चळवळीचें मुखेल ब्रीदवाक्य. एकठांय काम केले बगर उदरगत शक्य ना, असो ताचो अर्थ. पूण थोडे कडेन एकवटान काम करून संचालक मंडळान स्वताचोच उद्धार केल्ल्याचें दिसून आयलां. आॅडीट वेळार दिनात, बोगस आॅडीट दाखयतात, राजकी हस्तक्षेप जाल्ल्यान सोसायटी दुबळी जाता. संचालक मंडळांत पेझाद लोक आशिल्ल्यान कारवाय जायना… हातूंत भड्डटात मात ठेविदार. भोवराज्य सोसायटींचेर तर थळाव्या सरकारांचें नियंत्रण आसताच अशें ना. चड व्याज मेळटा म्हूण लोकूय गुंतवणूक करीत रावतात. दिवाळें काडल्यार खातेदारांक 5 लाखां मेरेन राखण मेळटा. मात दुडू मेळपाक उशीर लागता. पतसंस्थांक विमो आसना. म्हणटकच मालमत्ता विकप, रिणां वसूल करप, लिक्विडेशन प्रक्रिया आनी मागीर ठेविदारांक पयसो मेळटा. कोर्ट, पुलीस, ग्राहक मंच हांची मजत घेवं येता. पूण तीय वेळकाडू प्रक्रिया. पतसंस्थांक विम्याची राखण दिवंक जाय. आॅडीट दिसाळ्यांनी जाहीर जावंक जाय. फांट्यांक परवाने दितना कडक अटी घालूंक जाय. त्यो दुबळ्यो आसल्यार मात सहकारूय शोशणाचें साधन जाता, हें कोणें विसरचें न्हय.