भांगरभूंय | प्रतिनिधी
पणजी, प्रतिनिधी : सहकार रत्न पुरस्कारा खातीर राज्यांत एकूय पात्र व्यक्ती सांपडूक नाशिल्ल्यान अंदू ‘सहकार रत्न’ पुरस्कार दिवचें नात. डॉ. दत्ताराम भास्कर देसाय हांकां ‘सहकार भूशण’ जाल्यार प्रतिमा धोंड हांका ‘सहकार श्री’ पुरस्कार जाहीर जाला. सहकार मळार बरी सेवा दिल्ले खातीर दितात तो सहकार पुरस्कार गोविंद नायक आनी गौरी शिरवयकार हांकां फावो जाला.
सहकार मंत्री सुभाष शिरोडकार हांणी आयज पत्रकार परिशदेंत पुरस्कारांची घोशणा केली. सहकार सप्तकाच्या समारोप सुवाळ्यांत (20 नोव्हेंबर) हे पुरस्कार भेटयतले.
उत्कृश्ट सहकारी संस्था म्हूण बाळ्ळेच्या आदर्श कृशी सहकारी संस्थेची निवड जाल्या. हे भायर मेरशी विकेएसएस संस्था, होंडाची एसीजीएल कर्मचारी क्रेडीट सोसायटी आनी म्हाड्डोळची वीपीके अर्बन सोसायटी हांका उमेद वाडोवपी पुरस्कार फावो जाल्यात.
सहकार पुरस्कारां खातीर सरकार अर्ज मागयता. अर्जांची तपासणी करून शिफारस करपाक खासा समिती आसता. समितीन अंदूं सहकार रत्न पुरस्कारा खातीर कोणाचीच शिफारस करूंक ना. सावयवेरे वीकेएसएस सोसायटीचे उदरगतीक योगदान दिवपी डॉ. दत्ताराम देसाय हांची सहकार भूशण पुरस्कारा खातीर निवड जाल्या. रोख रु. 75 हजारांचो हो पुरस्कार आसा. महिला सहकारी बँकेच्यो फाटली 31 वर्सां अध्यक्ष आशिल्ल्या प्रतिमा धोंड हांका सहकार श्री पुरस्कार जाहीर जाला. 50 हजारांचो हो पुरस्कार आसा.
पिर्ण सहकारी दुद संस्थेचे कर्मचारी गोविंद नायक आनी सहकार खाते कर्मचारी क्रेडीट सोसायटीची कर्मचारी गौरी शिरवयकार हांकां सहकार सहाय्यक पुरस्कार फावो जाला. 25 हजारांचो हो पुरस्कार आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
