भांगरभूंय | प्रतिनिधी
मंत्री शिरोडकार : पर्यटन, नुस्तें उद्देगाक आस्पावन घेवपाचेर भर
भांगरभूंय । प्रतिनिधी
मुरगांव : फुडलें सहकार सप्तक सुरू जावचे आदीं गोंयांतलें सहकार निबंधक कार्यलय पुराय तरेन पेपरलेस करतले, अशें सहकार मंत्री सुभाष शिरोडकार हांणी जाहीर केलें.
राज्य सरकाराचें सहकार खातें, गोंय राज्य सहकारी संघ, नाबार्ड आनी सहकार अर्बन क्रेडीट कॉ. सोसायटीच्या जोडपालवान राष्ट्रीय सहकार सप्तकाच्या निमतान आयोजीत केल्ले कार्यावळींत मंत्री शिरोडकार उलयताले. ह्या वेळार माचयेर आमदार कृष्णा साळकार, सहकार निबंधक आशुतोष आपटे, राज्य सहकारी संघाचे चॅरमॅन विजयकांत गांवकार, मुखेल वक्ते जयेश पांडे, सहाय्यक निबंधक मोनल मणेरीकार आनी सहकार पत संस्थेचे चॅरमॅन उदय प्रभू उपस्थीत आशिल्ले.
मंत्री शिरोडकार हांणी सांगलें, देशाचे उदरगतींत सहकार खात्याची भुमिका म्हत्वाची आसा. देशांतले 30 कोटी भारतीय आयज सहकार मळा कडेन संबंदीत आसात. ह्या मळाचेर पारदर्शकता म्हत्वाची. सहकार निबंधक कार्यालय आतां पेपरलेस करतले. ताचे आदीं गोंयांतल्यो सगल्यो नोंद आशिल्ल्या संस्था मुखेल्यां खातीर कार्यशाळा आयोजीत करून नव्या उपक्रमा संबंदांत म्हायती दितले. कारण संस्था जे मेरेन पेपरलेस वेव्हार करपाक मुखार सरनात ते मेरेन ही येवजण येसस्वी जावपाक शकना.
मुरगांव म्हाल म्हणल्यार गोंयचें प्रवेशदार म्हूण वळखतात. ह्या वाठारांत व्हड प्रमाणार संस्था तयार जावपाची गरज आसा. हाचे मुखार पर्यटन आनी नुस्तें उद्देगाक सहकार मळांत आस्पावन घेवचे खातीर भर दितले, अशेंय मंत्री शिरोडकार हांणी सांगलें.
आमदार साळकार हांणी सांगलें, सहकार चळवळीच्या माध्यमांतल्यान सर्वांगी उरगतीची मोख मेळोवप शक्य आसा. ही चळवळ फुडें व्हरचे खातीर युवा वर्ग तशेंच बायलांनी वांटो घेवचो, असो तांणी उलो मारलो.
अहमदाबाद गुजरातच्या त्रिभुवन सहकारी विद्यापिठाचे प्रा. जयेश पांडे हांणी ‘सहकार चळवळींतले बदल आनी ताचे फायदे’ ह्या विशयाचेर कांय देखी दिवन मार्गदर्शन केलें.
सहकार निबंधक आशुतोष आपटे हांचेंय ह्या वेळार भाशण जालें. सहकार संस्थेचे ज्येश्ठ वांगडी म्हूण हरिचंद्र च्यारी, सहकार पत संस्थेची वरिश्ठ वेवस्थापक शैला मयेंकार आनी सहकार निधी डिपोझिटर (एसएनडी) म्हूण गुरुदास शिमेपुरुषकार हांचो मुखेल सोयऱ्यांचे हस्तुकीं सत्कार केलो. तशेंच वेगवेगळ्या गटांतल्या विद्यार्थ्यांक शिश्यवृत्ती भेटयली. उदक प्रभू हांणी येवकार दिलो. उपाध्यक्ष संतोष खोर्डुवेंकार हांणी सुत्रसंचालन केलें जाल्यार सहाय्यक निबंधक मोनल मणेरीकार हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
