भांगरभूंय | प्रतिनिधी
सुभाष शिरोडकारः सोसायटींतल्या गैरवेव्हारांचेर नियंत्रण दवरपा खातीर उपाय
पणजी : सहकारी संस्था तशेंच क्रेडीट सोसायटींनी जावपी गैरवेव्हाराचेर नियंत्रण दवरपा खातीर आतां सरकारा वतीन नेमान वेव्हारांची तपासणी जातली. सहकार खात्याचे अधिकारी सहकारी संस्था तशेंच क्रेडीट सोसायटींच्या वेव्हारांची तपासणी करतले. ते भायर लेखा परिक्षण अहवाल सादर करप बंधनकारक आसतलें. सहकार मंत्री सुभाष शिरोडकार हांणी ही म्हायती दिली.
सहकार मंत्री सुभाष शिरोडकार हांणी सोमारा मंत्रालयांत पत्रकार परिशद घेतली. ह्या वेळार सहकार खात्याचे अधिकारी हाजीर आशिल्ले.
लोकांच्या तशेंच राज्याचे उदरगती खातीर सहकार चळवळ घटमूट जावप गरजेची आसा. सगल्या गांवांनी एक वा दोन सहकारी सोसायटी आसात. सहकार संस्थांक लागून लोकांक रीण मेळपा सयत वेपार करपाची संद मेळटा. सहकार वाठार हो विस्वासाचेर चलता. सहकारी संस्थां तशेंच क्रेडीट सोसायटींची विश्वासार्हता म्हत्वाची आसा. सहकारी संस्थां तशेंच क्रेडीट सोसायटींनी हालींच्या काळांत गैरवेव्हार जावपाक लागल्यात. गैरवेव्हारांचेर नियंत्रण दवरपा खातीर क्रेडीट सोसायटींच्या कारभाराची तपासणी जातली. सहकार खात्याचे अधिकारी लेखा परिक्षकां सयत तपासणी करतले. कारभार सारको नासलो जाल्यार संबंदीत संस्थेक शिटकावणी दितले. सहकारी संस्था वा क्रेडीट सोसायटीचे भागधारक आसतात. ह्या भागधारकांनी गैरवेव्हाराचेर आवाज उठोवपाक जाय. सरकाराक कल्पना दिवपाक जाय, अशें सहकार मंत्री सुभाष शिरोडकार हांणी ह्या वेळार सांगलें. म्हापसा अर्बन आनी मडगाव अर्बन ह्यो दोन बँकांनी दिवाळें काडलें. तशेंच विजनरी, अष्टगंधा आनी माशेल अर्बन ह्या बँकांनी गैरवेव्हार जाला. हाका लागून लोकांचे पयशे बुडल्यात. कारवाय करून ठेविदारांचे पयशे वसूल करपाचे यत्न सुरू आसात अशें सुभाष शिरोडकार हांणी ह्या वेळार सांगलें.
सहकारी क्रेडीट सोसायटींची बिगर भांडवली मालमत्ता (एनपीए) 2025 उपरांत वाडपाक जायना म्हूण सरकार खासा उपाय येवजण करतलें. एनपीए वाडत रावलो जाल्यार सहकारी सोसायट्यो भांकरूट जावपाचो घात आसता अशें सहकार मंत्री सुभाष शिरोडकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
