भांगरभूंय | प्रतिनिधी
भांगरभूंय । प्रतिनिधी
पणजीः राज्यांतले सहकार मळ वाडोवपाचें आसल्यार सहकारी संस्थांनी चड बादिलकेन आनी समर्पीतपणान काम करपाक जाय अशें सहकार मंत्री सुभाष शिरोडकार हाणे बुंधवारा राज्य सहकार पुरस्कार वितरण कार्यावळींत उलयतना सांगलें. ह्या वेळार सहकार निबंधक अरविंद बुगडे, राज्य सहकारी बँकेचो उल्हास फळेदसाय, अरूण भट आनी हेर अधिकारी हाजीर आशिल्ले.
सहकारी संस्थांचो पोरूचो अर्थीक नियाळ “कभी खुशी कभी गम” अशे तरेचो आशिल्लो. कांय बरीं कामां जाल्यांत मात अजून बरे कामगिरीची अपेक्षा आसा. सहकारी संस्थांनी आपलें ऑडीट वेळार पुराय करपाची गरज आसा. ऑडीट जालें ना जाल्यार आपूण लोकांक जाप दिवपाक शकचो ना अशे शिरोडकारान फुडें उलयतना सांगलें. सहकार मळांत व्हडले बदल करपाचो सरकाराचो यत्न आास. ते खातीर वेगवेगळे उपक्रम चालीक लायतले. फुडल्या दोन तीन म्हयन्यांत सगल्या सहकारी संस्थांनी आपलो डेटा ऑनलॉनय स्वरुपांत करप बंधनकारक आसतलें. सहकार खात्या वांगडा दर सोमाराक बसका घेतले अशी म्हायती ताणे दिली. सहकार संस्थांनी फकत एका मळाक म्हत्व दिनासतना पर्यटन, दर्या कडेन जोडल्ली ब्ल्यू इकॉनोमी कडेन लक्ष दिवपाचो सल्लो ताणे दिलो.
सहकार रत्न पुरस्कार फावो जाल्ल्या प्रेमानंद चावडीकार हाणे सांगलें की गोंयात सहकार मळार काम करपाक भरपूर वाव आसा. तरणाट्यांनी त्या कामा खातीर फुडाकार घेवपाची गरज आसा. गोंयांतल्या सहकारी बँन्को तंत्रगिन्यानांत फाटी आसात. ताका लागून खाजगी बँको फुडें वतात, सहकार मळांत काम करपी वावुरप्यांनी नवें तंत्रगिन्यान आपणावपाक जाय अशें ताणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
