भांगरभूंय | प्रतिनिधी
पणजी : राज्यांतल्या सहकारी सोसायट्यो तशेंच बँकांतली अर्थीक उलाढाल वाडत आशिल्ल्यान वर्सभराची वाड 3612 कोटी आसा. 2022 – 23 वर्सा सहकारी संस्थांची उलाढाल 9923 कोटी आशिल्ली. ती 2023 – 24 वर्सा 13 हजार 535 कोटींचेर पाविल्ल्याची म्हायती सहकार मंत्री सुभाष शिरोडकार हांणी दिली. 2024 – 25 वर्साचें बँकांचें ऑडिटिंग सुरू आशिल्ल्यान नोव्हेंबर मेरेन अर्थीक ऊलाढालीची आंकडेवारी उपलब्ध जातली.
राष्ट्रीय सहकार सप्ताहाची म्हायती दिवपा खातीर सहकारमंत्री सुभाष शिरोडकार हांणी सोमारा पर्वरे मंत्रालयांत पत्रकार परिशद घेतली. ह्या वेळार तांणी वयली म्हायती दिली.
गोंयांत 14 नोव्हेंबर ते 20 नोव्हेंबर ह्या काळांत राष्ट्रीय सहकार सप्तकाचें आयोजन करतले. राज्यांत सगळेच कडेन दर दिसा विवीध उपक्रम तशेंच कार्यावळी जातल्यो. सहकारा वरवीं आत्मनिर्भर भारत हे संकल्पनेचेर आदारीत अंदूंचें सहकार सप्तक मनयतले.
सहकार अभ्यासक्रमा खातीर एमओयू
गांधीनगर हांगच्या त्रिभुवन विद्यापीठ हें सहकार मळावेलें अभ्यासक्रमाचें एक अग्रगण्य विद्यापीठ. सहकार सप्तका वेळार ह्या विद्यापीठा कडेन सामंजस्य करार (एमओयू)करतले. सहकार मळावेलें प्रमाणपत्र, पदविका (डिप्लोमा) आनी पदवी (डिग्री) अभ्यासक्रम विद्यापीठा वतीन राबयतले. सहकार मळार तज्ज्ञ आनी कुशळ मनीसबळाची गरज आसा. हाका लागून हे अभ्यासक्रम सुरू केल्यात.
ग्रामीण भागांत तरणाट्यांचे गट वा फार्मर्स क्लब स्थापन करून सहकार मळा वरवीं शेती वाडोवपाचो ध्येय आसा. सहकार मळा वरवीं 2 हजार हेक्टर जमीन लागवडी खाला हाडपाचें ध्येय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
