भांगरभूंय | प्रतिनिधी
फाल्यां सावन नव्या शिक्षणीक वर्साची सुरवात
पणजी : राष्ट्रीय शिक्षण धोरणाच्या प्रभावी कार्यवाही खातीर अंदूं एप्रील सावनच शिक्षणीक वर्साक सुरवात जाता. सवी ते बारावे मेरेनचे (अकरावी सोडून) वर्ग फाल्यां सोमारच्यान सुरू जरी जाले तरी सवी, णववी आनी धावे यत्ते खातीर एनईपी लागू जाता. सवे यत्ते खातीर ब्रिज (एक्टीविटी बेसड लर्निंग) अभ्यासक्रमान शिक्षणीक वर्साचो श्रीगणेशा जातलो.
सवेचे यत्ते खातीर पुस्तकां बदल्ल्यांत. मराठी आनी कोकंणी सोडून हेर सगल्या विशयांचीं पुस्तकां उपलब्ध जरी आसलीं तरी एप्रिलंात पाठ्यपुस्तकांतल्या अभ्यासक्रमाचेर भर दितले. सगले विशय प्रात्यक्षीक उपक्रमाच्या (एक्टीविटी बेसड लर्नींग) आधारार शिकयतले. गणितांत पाढे म्हणपा वांगडा गुणाकार, भागाकार तशेंच हर गणितां प्रात्यक्षिकांच्या आधारार शिकयतले. भाशा विशयां सयत विज्ञान आनी समाजशास्त्राचो विशय प्रात्यक्षिकांच्या आधाराचेर शिकयतले. राज्य शिक्षण संशोधन आनी प्रशिक्षण मंडळाची (एससीईआरटी) संचालक मेघना शेटगांवकार हांणी ही म्हायती दिली. ब्रिज अभ्यासक्रमा विशींचें प्रशिक्षण सवेच्या सगल्या शिक्षकांक दिल्यात. हाका लागून ब्रिज अभ्यासक्रमांत कसलेच तरेची आडखळ आसची ना. सवेच्या एखाद, दुसर्या विद्यार्थ्याकडेन विहीत पुस्तकां नासलीं तरी एप्रिलांत कसलेच तरेची आडखळ जाणवची ना, अशें शेटगांवकार हांणी सांगलें.
राष्ट्रीय शिक्षण धोरणांत सवेक सावन माध्यमीक टप्पो सुरू जावपाचो आशिल्ल्यान ब्रिज अभ्यासक्रम म्हत्वाचो थारतलो. अंदूं यत्ता धावे खातीरूय पयलेच फावट राष्ट्रीय शिक्षण धोरणाची कार्यवाही जातली. धावेच्या पुस्तकांत बदल जावंक ना. सगलीं पुस्तकां बाजारांत उपलब्ध आशिल्ल्यान शिकोवपाचक कसलीच आडखळ जावची ना. दर वर्सा परीक्षे उपरांत एप्रिलांत सुटी आसता. अंदूं मात वर्ग सुरू जाल्ल्यान विद्यार्थी आनी पालकां खातीर एक वेगळोच अणभव आसतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
