भांगरभूंय | प्रतिनिधी
हावसिंग बोर्डान कांय गांवांनी थारावीक आकाराची, शैलीचीं घरां बांदलीं. तीं लोकांनी धडाधड विकत घेतलीं. उपरांत कांय जाणांनी…
स्वताचें घर आसचें अशी दरेका मनशाची इत्सा आसता. नोकरेक लागून कांय वर्सां जालीं काय ते स्वताचें जाण्ट्यांचें घर वाडयतात वा नवो फ्लॅट घेतात. घर नव्यान बांदप, नव्यो कुडी काडप वा तेर्रासाचेर घर बांदप जाता. मात थोड्यांक घरच्यांचोच विरोध सोंसचो पडटा. कांय घरांचो जागो वादग्रस्त जमनींत आसता. हेर आडमेळींय आसतात. थोडे कामा, धंद्यांक लागून गांवांत रावनात वा कांय जाणांक शारांतूच रावपाचें आसता. तेय शारांत घर घेतात. फ्लॅट हो अर्थांत रेडिमेड मेळटा, देखून चडशे फ्लॅट घेवपाचेरुच चड भर दितात. शारांत वा उपनगरांत फ्लॅटांचें मोल मळबाक तेंकलां. लाखांनी गोंयकारांक ते घेवप शक्य जायना वा नोकरेंतल्यान निवृत्त जाय मेरेन रिणाचे हप्तेच फारीक करीत रावचें पडटा. सरकारान सवाय मोलांत फ्लॅट दिवपाची येवजण तयार केल्या. स्वताचें घर नाशिल्ल्यांक तिचो लाव घेवपाक मेळटलो. जांकां खऱ्यांनीच घराची गरज आसा, अश्या गोंयकारांकूच ते मेळचे.
गोंयांतलीं बरींच कुटुंबां भाटकारांच्या जमनींत रावतात. बरींच वर्सां थंय रावप्यांक कायद्यान ती जमीन मेळ्ळ्या. पूण फक्त तीनशे चौखण मिटर. कुटुंब वाडिल्ल्यान तांकां घर वाडोवपाक वा नवें घर बांदपाक भाटकार परवानगी दिनात. एखादो आडवाद आसत. दुसऱ्यांचे जमनींत रावपी वा कांय कारणांक लागून अर्थीक नदरेन गरिबूच उरिल्लीं बरींच कुटुंबां आसात. तांचे खातीर सरकारी जमनींत इमारती बांदून तातूंतले फ्लॅट दिवपाची ही येवजण. विशेश म्हणल्यार त्या फ्लॅटांचें मोल 10 ते 15 लाख रुपया इतलेंच आसतलें. फुडल्या दोन वर्सांनी ही येवजण प्रत्यक्षांत येतली. मुख्यमंत्री डॉ. प्रमोद सावंत हांणी पणजी दूरदर्शना वयले ‘हॅलो गोंयकार’ कार्यावळींत ही म्हायती दिली.
ही येवजण घराचे आशेन उबी जीण वाट पळोवपी गोंयकारांक थाकाय दिवपी आसा. पूण, तिचो फायदो येवजणेक लायक आशिल्ल्या गोंयकारांकूच मेळचो. कारण 15 लाख ही कांय लोकां खातीर किरकोळ रक्कम. कोणाच्याय नांवाचेर ते सहज 4- 5 फ्लॅट घेवन मागीर चड मोलाक विकूं शकतात. तांचे नदरेन ही एक प्रकारची अर्थीक गुंतवणूक आसूं येता! कसलेच तरेचे गैरप्रकार, गैरकारभार हे येवजणेंत जावचे नात, हे खातीर संबंदीतांक दोळ्यांत तेल घालून म्हणटात ते भशेन नदर दवरची पडटली. कोणे वायट धरचें न्हय. पूण प्रत्येक वस्तू, येवजणेचो गैरफायदो कसो घेवचो हातूंत पीएचडी केल्ले लोक चड आसात. तांचे तुळेन प्रामाणीक लोक तशे कमीच. आनीक एक गजाल म्हणल्यार, ह्या इमारतींचो, फ्लॅटांचो दर्जो बरो आसचो. सध्याच्या घर निर्माण वसणुकांचो नियाळ घेवन पळयल्यार कोणाकूय हें पट्टलें. गोंय हावसिंग बोर्ड सुरू जालो 1968 त. राज्यांत 1980, 90 च्या दशकांत घर निर्माण वसणुकांक नेट आयलो. जो तो घर बांदपाक लागलो वा घर घेवपाक लागलो. हावसिंग बोर्डान कांय गांवांनी थारावीक आकाराची, शैलीचीं घरां बांदलीं. तीं लोकांनी धडाधड विकत घेतलीं. उपरांत कांय जाणांनी ती चड पयशांक दुसऱ्यांक विकलीं. सरकारी अधिकाऱ्यांनी आतां मुद्दाम ह्या वसणुकांनी वचून पळोवणी करची. घरां घेतिल्ल्या बऱ्याच कुटुंबांनी आदलीं घरां मोडून थंय आलिशान, गडगंज घरां, बंगले बांदल्यांत, तें दिसतलें. तातूंत तांची कांयच चूक ना. कारण तांच्या कुटुंबाचो विस्तार जाला. थोड्या लोकांच्या मतान, त्या आदल्या घरांचो दर्जोय तितलोसो बरो नाशिल्लो. हावसिंग बोर्डाचे जमनींत थोड्यांनी वेवसायिक इमारतीय बांदल्यात खंय. ही सवाय फ्लॅटांची येवजण बेगीन आकाराक येवची.
सांसणाची समस्या
गोंयांत रस्त्यांची बाबत स्थिती ही आतां एक सांसणाची समस्या जाल्या. ज्या कंत्राटदार, अभियंत्यांनी रस्त्याच्या कामांत भानगड केल्या, तांचेर कडक कारवाय करपाची शिटकावणी मुख्यमंत्र्यान दिल्या. पावसांत व्हांवन गेल्ल्या रस्त्याचें आॅडीट जालां. ताचो अहवाल मेळ्ळा. आतां दोशी व्यक्तींचेर कारवाय जातली, अशें उतर तांणी दिलें. खरें म्हणल्यार जंय रस्त्यार सदांच फोंडकुलां पडटात थंय काँक्रिटाचो वापर करप वा पेव्हर्स घालून रस्तो करप बरें. रस्ते खणपाच्या प्रकारा कडेनूय लक्ष दिवपाक जाय. टेलीफोन, इंटरनेट केबल, भुंयगत वीज केबल, नळाचें कनेक्शन घेवपाक रस्ते खणप बाराय म्हयने चालू आसता. मात, खणिल्लो रस्तो सारको पुरोवप जायना. कांय कडेन लोबर, माती घालतात. पावसाच्यो दोन दडको पडल्यो काय रस्त्या वयलो चर वा कुशीचें फोंडकूल मूळ रुप घेता.. 99 टक्के रस्त्यांचेर आडवे चर, चौकोनी फोंडकुलां दिसतात, तीं राज्य, केंद्र सरकाराच्या खात्यांनी वा खाजगी कंपनींनी खणिल्लीं. ताका जापसालदार कोण? हे बेशिस्तीक लागूनय अपघात घडल्यात, हें कोणे विसरचें न्हय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
