भांगरभूंय | प्रतिनिधी
मुख्यमंत्री : निर्गत उणी करपाची केल्ली आमदारांनी मागणी
भांगरभूंय । प्रतिनिधी
पणजी : सभाघरांत बुधवारा नुस्त्याचेर घोस्तान चर्चा जाली. गोंया भायर वचपी नुस्त्यांची निर्गत कमी करून गोंयकारांक सवाय दरांत नुस्तें दिवपाची मागणी आमदारांनी केली. तांकां जाप दितना मुख्यमंत्री डॉ. प्रमोद सावंत हांणी गोंयकारांक नुस्तें परवडपी दरांत उपलब्ध करून दिवपाचें धोरण स म्हयन्यांनी लागू करपाची घोशणा केली.
गोंयांत जेटीर ट्रक येवन ल्हान-व्हड नुस्तें भायल्या राज्यांनी व्हरतात. हे खातीर गोंयांत नुस्त्याचो उणाव जाता आनी भायल्या राज्यांतल्यान येवपी नुस्तें म्हारग दरांत गोंयकारांक घेवचें पडटा. हे खातीर गोंयांतल्यान जावपी नुस्त्याचे निर्गतीचेर नियंत्रण येवप गरजेचें, अशी सांताक्रुझचे आमदार रुडोल्फ फर्नांडीस हांणी मागणी केली.
2024-25 त 45 हजार टन नुस्तें भायल्या राज्यांत आनी देशांनी निर्गत केलें.
नुस्तें निर्गत करपाचो सगळो विशय हो केंद्रीय वाणिज्य आनी उद्देग मंत्रालया खाला येता. देखून आमी हाचेर नियंत्रण दवरपाक शकनात, अशें रझांव नुस्तेमारी मंत्री नीळकंठ हर्ळणकार हांणी सांगलें.
गोंयकारांक मोडसो, इसवण, लोबस्टर हे सारकिल्लें नुस्तें सवाय दरांत केन्ना खावपाक मेळटलें? नुस्तें निर्गतीचेर नियंत्रण दवरून लोकांक परवडपी दरांत नुस्तें खावपाक दिवपा खातीर धोरण अंमलात हाडपाची गरज आसा, अशें विरोधी पक्ष फुडारी युरी आलेमांव हांणी सांगलें.
हे विशीं जाप दितना मुख्यमंत्री डॉ. प्रमोद सावंत हांणी सांगलें, गोंयांत नुस्त्यांची दोन भशेन आयात जाता. एक थेट नुस्तें भायर वता आनी दुसरे प्रक्रिया केल्लें नुस्तें भायर वता. जें नुस्तें गोंयकार खायनात तेंच नुस्तें भायर धाडटात.
गोंयकारांक परवडपी दरांत नुस्तें दिवपा खातीर फुडाराक सरकार धोरण चालीक लायतलें. हातूंत बारीक नुस्तेकार, नुस्त्यांची व्हॅन आनी रिक्षा हांकां प्रधानमंत्री मत्स्य संपदा येवजणे खाला अनुदान दिवन दराचेर नियंत्रण हाडटले. फुडल्या स म्हयन्यां भितर हें धोरण चालीक लागतलें, अशें आस्वासन मुख्यमंत्री डॉ. प्रमोद सावंत हांणी सांगलें. नुस्तेकारांक नुस्तें विकपा खातीर व्हॅन आनी रिक्षा विकती घेवपा खातीर अनुदान दिवपाची येवजण खंय पावली, असो प्रस्न मडगांवचे आमदार दिगंबर कामत आनी सांतआंन्द्रेचे आमदार विरेश बोरकार हांणी केलो. हे विशीं जाप दितना नुस्तेमार मंत्री हर्ळणकार हांणी सांगलें, नुस्तेमार खात्याची येवजण आसा तातूंत लाभार्थ्यांक 50 हजार रुपया डिपोझीट भरून ई-रिक्षा दिता. एकदां अर्ज भरले उपरांत आठ दिसां भितर प्रक्रिया जावन हे येवजणेचो लाव मेळटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
