भांगरभूंय | प्रतिनिधी
तांदूळ, गंव हाचे बगर हेर वस्तू विकपाक दिवपाचो विचार
मडगांव: सवाय धान्य दुकान चलोवप हें गोंयच्या लोकांच्या सेवेचें काम आसा. ह्या दुकानदारांचे प्रस्न सोडोवपाचो खात्याचो यत्न आसा. दुकानां रंगोवपाचें काम सुरू केलां. दुकानदारांचे अर्थीक उत्पन्न वाडपा खातीर दुकानांत तांदूळ, गंव हाचे बगर साकर आनी हेर वस्तू विकपा खातीर दिवपाचो विचार आसा अशें मंत्री रवी नायक हांणी सांगलें.
नागरी पुरवण आनी गिरायक वेव्हार खात्या वतीन रेशन धान्य दुकानदारांचे प्रस्न समजून घेवपा खातीर मडगांव रवींद्र भवनांत कार्यावळीचें आयोजन केल्लें. ह्या वेळार मंत्री रवी नायक, सचीव संजीत रॉड्रिग्ज, संचालक जयंत तारी, शैलेश म्हांब्रो बी मानेस्त हाजीर आशिल्ले.
रेशन धान्य दुकानदारांचे प्रस्न समजून घेवपा खातीर ह्या कार्यावळीचें आयोजन केलां. सुवातेच्या भाड्यांत वाड जाल्या. विवीध कामां करपी दुकानदारांक एकठांय साडेणव हजार रुपया म्हयन्याक दितले. दुकानदारांचे अर्थीक उत्पन्न वाडपाची गरज आसा. ते खातीर दुकानांत विवीध वस्तूंची विक्री जायत जाल्यार तें शक्य आसा. दुकानदारांक येरादारी खर्च दितात तातूंतय वाड करपाचो विचार सुरू आसा. ते नदरेंतल्यान चर्चा केले उपरांत निर्णय घेतले अशें मंत्री नायक हांणी म्हणलें.
रेशना खातीर पांच लाखां मेरेन उत्पन्न मर्यादा आसा. ती आतां आठ लाखां मेरेन वाडोवपाचो निर्णय घेतला. ताका लागून रेशन धान्य दुकानदारां कडेन चड रेशनकार्डां येतलीं आनी दुकानदारांक फायदो जातलो. फॉर्टिफायड तांदळा भितर कुडीक गरजेच्यो सगल्यो व्हिटामीन आसतात. ते खातीर रेशन दुकानाचेर फॉर्टिफायड तांदूळ दीत आशिल्ल्याचें मंत्री नायक हांणी म्हणलें.
रेशन धान्य दुकानदारांच्या अर्थीक फायद्यांत वाड जावची, सेवा सुरळीत जावची हे खातीर विचारविनिमय केला. धान्य येरादारी करप्यांक योग्य मोबदलो दिवपाचें थारायलां. पीओएस (पॉस) मशीन नवी दितले अशें संचालक जयंत तरी हांणी म्हणलें.
जाल्यार धान्य दुकानदारांक दितात तें कमिशन केंद्र सरकाराच्या निकशा प्रमाण चडांत चड दितात. ताचे परस चड दिवंक मेळनाशिल्ल्यान ताचेर पर्याय काडपाचो यत्न करतात. दुकानां मेरेन म्हाल पावोवपा खातीर निविदा काडल्या आनी म्हयनोभरांत हें काम सुरू जातलें. कोवीड काळा सावनचो उरिल्लो निधी डिसेंबर मेरेन मेळटलो आनी उपरांत वांटप करतले अशें सचीव संजीत रॉड्रिग्ज हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
